کرکٹ کا سابق کپتان اور سیاسی ریلوکٹا۔۔ارشد بٹ

SHOPPING

کچھ عرصہ قبل عمران خان نے پاکستان میں کرکٹ کھیلنے والے غیر ملکی  کھلاڑیوں کو ریلو کٹا کے لقب سے مخاطب کرکے پورے پاکستان میں اس اصطلاح کی چرچا کردی تھی۔ لاہور میں کھیلوں کی دنیا میں ریلو کٹا کا استعمال عام ہے۔ ریلو کٹا اس بد قسمت کھلاڑی کو کہتے ہیں جو کسی ٹیم میں جگہ نہیں بنا پاتا۔ حادثاتی صورت حال میں اگر کسی ٹیم کو اضافی کھلاڑی کی ضرورت پڑ جائے تو گیم سے باہر بیٹھے ریلو کٹے کی قسمت جاگ اٹھتی ہے۔ اس لئے ریلو کٹا کسی ایک ٹیم کا وفادار نہیں ہوتا۔ وہ ہر وقت کسی بھی ٹیم کے ہاتھوں استعمال ہونے کو تیار رہتا ہے اور اسی میں خوشی اور اطمینان محسوس کرتا ہے۔

حیران ہونے کی ضرورت نہیں۔ پاکستان میں کرشمہ سازوں نے انواع و اقسام کے چھوٹے بڑے سیاسی ریلو کٹے پال رکھے ہیں۔ جو کرشماتی ہاتھوں کے اشاورں پر انہی کی گیم کھیلتے ہیں اور انہیں ہر وقت کرشماتی ایمپائر کی انگلی کی حرکت کا انتظار رہتا ہے۔ جمہوری حکومتوں کو عدم استحکام سے دوچار کرنا ہو، آئینی سیاسی نظام میں افراتفری پیدا کرنی ہو، کسی طالع آزما کے اقتدار پر غیر آئینی قبضہ کی راہ ہموار کرنی ہو، تو سیاسی ریلو کٹوں کے کھیل کا ہائی سیزن شروع ہو جاتا ہے۔ سیاسی ریلو کٹا کے کردار کو مزید سمجھنے کے لئے عمران خان کے سیاسی سفر کے اتار چڑھاؤ کا مختصر جائزہ لینے کی کوشش کرتے ہیں۔

1997 کے عام الیکشن میں عمران خان کی تحریک انصاف نے بھر پور شرکت اختیار کی تھی۔ اس وقت بھی ان کا دعویٰ تھا کہ وہ الیکشن میں زبردست کامیابی حاصل کرکے وزارت عظمیٰ کے منصب پر فائز ہونے والے ہیں۔ پی ٹی آئی کامیابی  کیا حاصل کرتی، خان ذاتی نشست بھی نہ جیت پائے۔ 2002 کے الیکشن میں بھی عمران خان کی تحریک انصاف کو بری طرح شکست کا سامنا کرنا پڑا۔ وہ قومی اسمبلی میں ذاتی نشست کے علاوہ کچھ حاصل نہ کر پائے۔ حالانکہ وزارت عظمیٰ کو چھونے کے لئے وہ جنرل مشرف کی فوجی حکومت اور اس کے غیر آئینی ریفرینڈم کی کھل کر حمائت کرنے کا جرم کر چکے تھے۔ جنرل مشرف کی مجرمانہ حمایت کرنے کی وجہ سے عمران خان جمہوری حلقوں میں مشکوک نظروں سے دیکھے جانے لگے اور وہ بطور ایک جمہوری سیاستدان اپنی ساکھ کھو بیٹھے۔ یاد رہے کہ خان 2008 کے عام الیکشن کا بائیکاٹ کرکے گھر بیٹھ گئے تھے۔ بے نظیر بھٹو کی شہادت اور نواز شریف کی وطن واپسی کے بعد خان نے رہی سہی ساکھ بچانے کے لئے الیکشن کے بائیکاٹ کا  راستہ اپنانے میں عافیت جانی۔

پیپلز پارٹی کی وفاقی حکومت کی ناقص کارکردگی کی وجہ سے 2011 کے بعد عمران خان ایک مقبول لیڈر بن کر ابھرے۔ ان کی یکدم مقبولیت کے پیچھے خفیہ ہاتھوں کا ذکر بھی زبان زد عام رہا۔ اسٹیبلشمنٹ کے پالتو سیاسی پرندے جوق در جوق پی ٹی آئی کی چھتری پر بیٹھ کر خان کی طاقت بڑھانے میں جت گئے۔ 2013 کے عام انتخابات کے نتیجہ میں صوبہ خیبر پختون خوا کی حکمرانی کا اختیار تو مل گیا۔ مگر عمران خان کا وزیر اعظم بننے کا خواب پھر بھی شرمندہ تعبیر نہ ہو سکا۔  پے در پے انتخابی شکستوں اور تیزی سے بڑھاپے کی جانب بڑھتے قدموں کی وجہ سے خان کے ذہن میں احساس شکست گھر کرنے لگا۔ پیپلز پارٹی کے پانچ سالہ اقتدار کے بعد نواز لیگ کا 2018 تک پانچ سالہ اقتدار عمران خان کو ایک گھناؤنے خواب سے کم  نہیں دکھائی   دے رہا تھا۔  اب نواز حکومت گرانے کا جنون سر پر سوار ہوگیا۔ کبھی دھاندلی کا رونا، کبھی کرپشن کا شور اور پھر جھولی میں آن گرا پانامہ۔ نجومیوں اور پیروں سے فال نکلوائے۔ چار سال تک دھرنے پہ دھرنا، احتجاج اور جلسے۔ پی ٹی وی پر حملہ اور پارلیمنٹ پر حملے کی تیاری۔ کپتان کو یقین تھا کہ اسٹیبلشمنٹ کا دباؤ اور عدلیہ کا دھکا نواز لیگ کی حکومت گرا دے گا۔ ہر دوسرے روز نیا اعلان کہ حکومت آج گری کہ کل۔ باخبر تجزیہ کاروں نے دہائی دینا شروع کر دی کہ دھرنوں اور احتجاجوں کے پیچھے جمہوریت دشمن سازشی خفیہ ہاتھ  کارفرما ہیں۔ اور پھر خان کے معتمد خاص اور پی ٹی آئی کے اس وقت صدر جاوید ہاشمی نے سازشی ہنڈیا چوراہے میں پھوڑ ڈالی۔

چار سال اقتدار کے بعد نواز شریف کو ایک عدالتی حکم پر وزارت عظمیٰ سے بے دخل کر دیا گیا۔ مگر وفاق اور پنجاب میں نواز لیگ کی حکومت برقرار رہی۔ اب اقتدار سے باہر میاں کی مقبولیت میں اضافے کے امکانات بڑھ رہے ہیں۔ میاں  نے جلسوں میں مشغول، خان کے سیاسی گڑھ پشاور میں بھی بڑا جلسہ کرکے دکھایا۔ اب نیب میاں کو جیل بھیجے یا الزامات سے بری کرے مگر میاں کی حکمت عملی کام کر گئی۔ میاں (ن) لیگ کو تتر بتر ہونے سے بچانے میں کامیاب رہے۔ اسٹیبلشمنٹ کے پیارے نون لیگ میں ہی ٹھہرے رہے بلکہ اسٹیبلشمنٹ کے دلارے مشاہد حسین پلٹ کر واپس آگئے۔  مذہبی جماعتوں کا اتحاد ایم ایم اے، خان کے راستے کا پتھر بننے والا ہے۔ اے این پی والے بھی سر گرم اور آئندہ  سیٹ اپ میں حصہ لینے کو پر امید ‘ کے پی کے میں زرداری بھی پی پی پی کے لئے جگہ بنانے کی تگ و دو کرنے لگے۔ یہ سب آئندہ الیکشن میں پی ٹی آئی کو صوبہ خیبر پختون خوا سے فارغ کرنے کے اشارے ہیں۔

دوسری طرف خان اور خیبر پختون خوا کی صوبائی حکومت ایک کے بعد دوسرے سکینڈل میں گھری صفائیاں پیش کرنے میں مصروف ہے ۔ ایک ارب درخت لگانے کا سکینڈل، ہیلی کاپٹر کا غیر قانونی استعمال، معدنی کانوں کی غیر قانونی کھدائی، لڑکیوں کے قتل اور جنسی جرائم، مثالی پولیس کی نااہلی کے قصے، تعلیمی اور طبی اصلاحات کا مفقود ہونا۔ اس کے علاوہ گلا لئی کے الزامات اور پیرنی سے شادی کی داستان۔ ریحام خان کی جلد شائع ہونے والی کتاب میں راز افشا ہونے کے خدشات پر ریحام خان کو زبان بند رکھنے کی دھکمکیاں۔ مجوزہ الیکشن قریب آنے کو ہیں مگر خان، پی ٹی آئی اور کے پی کے کی حکومت دفاعی پوزیشن اختیار کرنے پر مجبور ہے۔

SHOPPING

اب کرشمہ سازوں کی نظریں کس پر نظر کرم کرنے والی ہیں۔ کیا خان کا وزارت عظمیٰ پر برا جمان ہونے کا خواب ایک بار پھر چکنا چور ہونے والا ہے۔ اصل نتائج تو الیکشن کے بعد ہی برآمد ہوں گے۔ مگر تجربہ کار تجزیہ کاروں کا کہنا ہے کہ عمران خان کی پشت سے طاقتور حلقوں کا ہاتھ آہستہ آہستہ سرک رہا ہے۔ تجزیہ کاروں کا یہ بھی کہنا ہے کہ 2018 کے الیکشن کے نتیجہ میں اقتدار کا کھیل کھیلنے والی ٹیم میں عمران خان کی جگہ بنتی نظر نہیں آرہی۔

SHOPPING

مہمان تحریر
مہمان تحریر
وہ تحاریر جو ہمیں نا بھیجی جائیں مگر اچھی ہوں، مہمان تحریر کے طور پہ لگائی جاتی ہیں

بذریعہ فیس بک تبصرہ تحریر کریں

براہ راست تبصرہ تحریر کریں۔

Your email address will not be published. Required fields are marked *