آج ادب کی دنیا ایک بہت بڑے چراغ سے محروم ہو گئی۔

مارکیز کے ہم عصر، گبرئیل گارسیا کی طرح دھنک رنگی داستانوں کے خالق، نوبیل انعام یافتہ ماریو ورگاس یوسا آج 14 اپریل 2025 کو اس جہانِ فانی سے رخصت ہو گئے۔
ادب، سیاست، صحافت اور تاریخ ، ہر شعبے میں ان کی موجودگی ایک کائنات تھی۔ ان کی موت صرف ایک شخص کی موت نہیں بلکہ لاطینی امریکہ کے زندہ ضمیر کا خاموش ہو جانا ہے۔

اب آئیے، ہم ان کی زندگی کی کہانی کو ایک سلسلہ وار داستان میں بیان کرتے ہیں ۔ ایک ایسے لڑکے کی کہانی جس نے ظلمت میں آنکھ کھولی، مگر الفاظ کو چراغ بنایا، اور اندھیروں کو ہرانے نکلا۔

ابتدائی برس (1936–1920)
عنوان: ارنسٹو ورگاس مالدونادو — ایک سفر کی ابتدا

1920 کی دہائی کے اوائل میں، پیرو سے تعلق رکھنے والے ایک نوجوان، ارنسٹو ورگاس مالدونادو نے اپنا آبائی شہر — لیما — چھوڑ دیا تاکہ وہ ارجنٹینا کے دارالحکومت، بیونس آئرس میں زندگی کو ایک نئے انداز میں آزما سکے۔
اس نے لاٹری جیتی تھی، اور اس کے مہم جُو مزاج نے اسے بیرونِ ملک جانے پر آمادہ کیا۔

جب تک اس کی جیب میں پیسے تھے، وہ شاید جنوبی امریکہ کے اس تاج محل جیسے شہر میں زندگی کے مزے لیتا رہا۔
مگر جب روزمرہ کی معاشی حقیقتوں نے خود کو ظاہر کیا، تو اس نے فیصلہ کیا کہ وہ پیشہ ور تربیت حاصل کرے گا تاکہ ائیر لائن پائلٹ بن سکے۔

کچھ برسوں تک اس نے ارجنٹینا کی مرچنٹ میرینز (تجارتی بحری بیڑے) میں کام کیا، اور پھر وطن واپسی کا ارادہ کیا۔
واپسی پر اس نے پاناگرا (Panagra) نامی ایک کمپنی میں ریڈیو ٹیلیگرافر کی نوکری حاصل کر لی — یہ کمپنی پیرو کے جنوبی علاقے میں واقع شہر ٹاکنا کے ہوائی اڈے پر کام کرتی تھی۔

ابتدائی برس (1936–1974)
باب اوّل: ارنسٹو ورگاس مالدونادو — خواب، ہجرت اور وراثت کی پرچھائیاں
1920 کی دہائی کے ابتدائی برسوں میں، ایک نوجوان پیرووی باشندہ، ارنسٹو ورگاس مالدونادو، نے اپنا آبائی شہر لیما چھوڑ دیا — یہ وہ شہر تھا جہاں اس کی پیدائش ہوئی، اور جس کی گلیوں نے اس کا لڑکپن دیکھا تھا۔ مگر ارنسٹو محض اپنی جائے ولادت تک محدود رہنے والا نہیں تھا۔ اس کا دل مہم جوئی اور نئے افقوں کی تلاش میں بے قرار تھا۔ جب اس نے اتفاقاً لاٹری جیتی، تو اسے ایسا محسوس ہوا جیسے قسمت نے اس کی پیٹھ تھپتھپائی ہو اور کہا ہو: “چل، دنیا دیکھ!”۔ چنانچہ اس کے دل میں جنم لینے والے خواب اسے ارجنٹینا کے دارالحکومت، بیونس آئرس لے آئے ۔ وہ شہر جو جنوبی امریکہ کا روشن ترین نگینہ مانا جاتا ہے۔

شروع کے دن شاید خوشیوں سے بھرپور تھے۔ جیب میں لاٹری کے پیسے تھے، اور سامنے ایک نیا، چمکتا دمکتا شہر۔ لیکن جلد ہی حقیقت کی ٹھوس زمین نے خوابوں کی پرواز کو روک لیا۔ معاشی بقا کی روزمرہ کی جدوجہد نے ارنسٹو کو اپنے پنجوں میں لے لیا۔ تب اس نے فیصلہ کیا کہ وہ کوئی باقاعدہ پیشہ اپنائے گا، اور اس مقصد کے لیے وہ ائیرلائن پائلٹ بننے کی پیشہ ورانہ تربیت حاصل کرنے لگا۔ کچھ سال ارجنٹینا کی مرچنٹ میرینز میں کام کرنے کے بعد، اس نے وطن واپس جانے کا ارادہ کیا۔ واپسی پر اس نے جنوبی پیرو کے شہر ٹاکنا کے ہوائی اڈے پر ایک کمپنی پاناگرا (Panagra) میں ریڈیو ٹیلیگرافر کے طور پر ملازمت حاصل کی۔

ٹاکنا میں نوکری سنبھالنے کے کچھ ہی عرصے بعد، ارنسٹو کی ملاقات ایک دوشیزہ ڈورا لیوسا اوریتا سے ہوئی، جو اپنے خاندان کے ہمراہ چھٹیاں گزارنے آئی تھیں۔ ڈورا کا تعلق اریقیپا کے ایک معزز، قدیم اور علمی خانوادے سے تھا، جسے عوامی حلقوں میں ایک “ڈسٹنگوئیڈا فامیلیا” (distinguished family) کے طور پر پہچانا جاتا تھا۔ ارنسٹو خود بھی ایک اچھی ساکھ رکھنے والے خاندان سے تعلق رکھتا تھا — ایک “فامیلیا بیئن” — لیکن ایسا خاندان جس کی سابقہ معاشی اور سماجی عظمت، پیرو کی غیر مستحکم سیاسی تاریخ کی بھینٹ چڑھ چکی تھی۔

محض ایک برس کے اندر، یعنی 1935 میں ارنسٹو ورگاس اور ڈورا لیوسا کی شادی ہو گئی۔ یہ رشتہ، اگرچہ محبت اور خلوص پر مبنی تھا، لیکن پیرو کے طبقاتی، سماجی اور ثقافتی ماحول میں اس کی نوعیت پیچیدہ بھی تھی، کیوں کہ ارنسٹو کے خاندان نے اپنے سابقہ رعب و دبدبے کو کھو دیا تھا۔ ان کے رشتے کو قبول تو کر لیا گیا، مگر اُس مخصوص آداب اور فاصلوں کے ساتھ جو اشرافیہ اپنے زوال پذیر طبقاتی ہمسفروں سے برتتی ہے۔

ارنسٹو ورگاس کی ابتدائی زندگی بھی کسی افسانوی کردار کے المیے سے کم نہ تھی۔ اس کی پیدائش 1904 میں لیما میں ہوئی ۔ ایک ایسا شہر جو اُس وقت سخت گیر روایت پسند، مذہبی اور سماجی طور پر منجمد فضا رکھتا تھا۔ اُس کی تعلیم کولیجیو گواڈالوپے ڈی لیما میں ہوئی، جو جرمن پادریوں کی نگرانی میں چلتا تھا اور اپنے شدید نظم و ضبط، سخت تعلیمی اصولوں اور مذہبی قدامت پسندی کے لیے مشہور تھا۔ اس کے والد، مارسیلو ورگاس، ایک سیاستدان آگستو دوران کے پُرجوش حامی تھے، جو کہ خود ایک غیر یقینی سیاسی شخصیت تھے۔ دوران کی غیر مستحکم سیاست نے مارسیلو ورگاس کے خاندان کو معاشی بحران سے دوچار کر دیا، اور اس کا سیدھا اثر ارنسٹو کی تعلیم پر پڑا ۔ وہ اسکول چھوڑنے پر مجبور ہوا، اور جوتے مرمت کرنے والے کارخانے میں کام کرنے لگا۔

یہی وہ دور تھا جب ارنسٹو کے والد نے اسے ریڈیو آپریٹر بننے کی بنیادی تربیت دینا شروع کی ۔ ایک ایسا ہنر جو بعد میں بیونس آئرس میں اسے ایک پیشہ ور راستہ فراہم کرے گا۔ مگر بچپن کی یہ معاشی تنگدستی، سماجی ذلت، اور تعلیمی مایوسی ارنسٹو کی شخصیت میں ایک تلخی، ایک غصہ، اور اندرونی کرب کے بیج بو گئی ۔وہ کرب جس کا اثر ایک دن اس کے بیٹے ماریو ورگاس یوسا کی شخصیت پر بھی پڑنے والا تھا۔

ارنسٹو کی مہم جُوئی کی فطرت محض حادثاتی نہ تھی۔ ماریو ورگاس یوسا کے بقول، یہ ان کے خاندان کی نسلی خصوصیت تھی — ایک خاندانی میراث جو سولہویں صدی کے اس پہلے ورگاس سے جڑی تھی جو کالونیائی عہد میں اسپین سے پیرو آیا تھا۔

اریکوئیپا کی سفید روشنی – لیوسا خاندان کی کہانی
جب ہم ماریو ورگاس یوسا کی شخصیت کے تخلیقی جوہر کا سراغ لگاتے ہیں تو ہمیں ان کی ماں کی طرف کا خاندانی پس منظر , یعنی لیوسا خاندان بہت اہم نظر آتا ہے۔
اگر ورگاس خاندان مہم جُو، سخت جان، اور جسمانی طور پر پرشکوہ تھا، تو لیوسا خاندان اس کے برعکس تھا: زیادہ تعلیم یافتہ، فنونِ لطیفہ میں دلچسپی رکھنے والا، اور تخلیقی ذوق سے آراستہ۔

یہ خاندان سترہویں صدی میں اسپین سے آ کر پیرو کے شہر “اریقیپا” میں آباد ہوا تھا اور اُس وقت یہ شہر ایک خوبصورت، نوآبادیاتی دور کی چھوٹی سی سفید رنگت والی بستی تھی، جو اپنے فنِ تعمیر، درجنوں گرجا گھروں، عمدہ شراب اور زرعی تجارت کے لیے مشہور تھی۔
شہر کی آبادی اس وقت پچاس سے ساٹھ ہزار کے درمیان تھی، اور یہاں کا معاشرہ زیادہ تر ہسپانوی نژاد سفید فاموں پر مشتمل تھا، جن کے درمیان تھوڑی سی تعداد میں مقامی نسلوں، میستیزو، اور کیریبین علاقوں سے لائے گئے افریقی غلاموں کی موجودگی بھی تھی۔

لیوسا خاندان کے ابتدائی جد خوان دی لا لیوسا ای لایگونو نے، اسپین سے آ کر اریکوئیپا میں سکونت اختیار کی، جہاں اس خاندان نے ایک گہرا علمی و تخلیقی اثر چھوڑا۔
جیسا کہ خود ماریو ورگاس یوسا لکھتے ہیں:

“وہ سرزمین جس سے وہ کبھی جدا نہ ہو سکے ،جہاں اس نے وکلا، پادری، راہبات، جج، اساتذہ، اہلکار، شاعروں، دیوانوں، اور چند فوجیوں کی ایک طویل نسل پروان چڑھائی۔”

یہ “دیوانے” بھی درحقیقت لیوسا خاندان کی منفرد خصوصیات کا حصہ تھے ،ان کے ہاں ایک روایت مشہور ہے کہ ایک لیوسا ایک دن دوپہر کے کھانے سے پہلے اخبار لینے گیا اور پچیس سال بعد اس کی موت کی خبر فرانس سے آئی۔
یہ واقعہ خاندان کے ان افسانوی قصوں میں شامل ہے جو یوسا کی تحریروں میں خواب و حقیقت کے درمیانی علاقے کو جلا بخشتے ہیں۔

یہ خاندان ادیبوں، شاعروں اور دانشوروں سے بھرا ہوا تھا۔
اریقیپا کی فضا، جو شاعری اور خطابت کا مرکز تھی، خود اس ذوق کو پروان چڑھاتی تھی۔ اسپین کے نوآبادیاتی نظام میں کئی شہروں کو “خطِ کتابت کی بستیاں” (ciudades letradas) کہا جاتا تھا، جہاں لفظ ہی طاقت تھا، اور علم ہی حکومت۔

یہاں ڈان بیلیساریو لیوسا دی ریویرا — ماریو ورگاس یوسا کے نانا — اپنی نسل کے ممتاز قانون دان، شاعر اور نثر نگار تھے۔
انہوں نے نہ صرف شاعری لکھی بلکہ اریکوئیپا کے معاشرتی رویّوں پر طنز بھی کیا، اور ایک ناول بھی شائع کیا۔ ان کی بیٹی، دورا لیوسا دی ورگاس — ماریو کی والدہ — اگرچہ خود ادیبہ یا مصورہ نہ تھیں، مگر بہت ذہین، پڑھنے کی شوقین اور علمی ماحول سے آشنا خاتون تھیں۔ ان کی تعلیم اریکوئیپا کے مشہور کولے جیو دل ساگرادو کورازون میں ہوئی، جسے فرانسیسی راہبات چلاتی تھیں۔

ماریو کی نانی، کارمن اوریتا دی لیوسا، شوقیہ مصورہ تھیں اور قدرتی مناظر کی پینٹنگز بنانے میں مہارت رکھتی تھیں۔ یہ پینٹنگز اتنی عمدہ تھیں کہ بعد میں ماریو کی والدہ نے لیما کے اپنے اپارٹمنٹ میں ان کو فخر سے آویزاں کیا، اور یوسا انہیں اپنے فنی ورثے کی جھلک سمجھتے تھے۔

لیوسا خاندان کا اصل تحفہ صرف رسم و رواج یا ثقافتی شان و شوکت نہیں تھا، بلکہ وہ علم و ادب کی پرورش تھی — ایک روحانی اور ذہنی فضا، جہاں کتابوں سے محبت، شاعری سے انس، اور تخیل کی پرواز کو عزت دی جاتی تھی۔