پیپلزپارٹی کے سینئررہنماؤں کی جانب سے نومنتخب صدرآصف زرداری کومبارکبادپیش کی گئی۔

سابق گورنر اور پیپلزپارٹی کے رہنما مخدوم احمدمحمود کاکہنا ہے کہ آصف علی زرداری کا صدر منتخب ہونا جمہوریت کی فتح ہے ۔نومنتخب صدر آصف علی زرداری کومبارکباد پیش کرتے ہیں۔ایک بار پھر انتخابی نتائج نے ثابت کردیا آصف علی زرداری وفاق کی علامت ہیں۔آصف علی زرداری سب پربھاری کا نعرہ سچ ثابت ہوگیا ۔آصف علی زرداری نے ہمیشہ جمہوری قوتوں کا بھروسہ بنے ہیں۔

رہنما پیپلزپارٹی شرمیلا فاروقی کاکہنا تھاکہ آج ایک تاریخ رقم ہوئی ہے۔آصف زرداری کو تاریخی مینڈیٹ ملا ہے۔ماضی میں بہت اچھی آئینی ترامیم لائے تھے۔اس دور میں بھی کئی مثبت اقدامات اٹھائے جائینگے۔تاریخ میں پہلی مرتبہ دوسری مرتبہ جمہوری صدر منتخب ہوئے ہیں۔

رہنماپیپلزپارٹی علی حیدر گیلانی کاکہنا ہے کہ آصف زرداری کو ووٹ دینے پر ن لیگ ، ق لیگ اور آئی پی پی کے دوستوں کا شکریہ ادا کرتا ہوں۔ فارم پانچ کے مطابق آصف علی زرداری کو 246 ووٹ ملے،محمود خان اچکزئی کو 100 ووٹ ملے ،چھ ووٹ مسترد ہوئے۔کچھ ووٹ ان کے مسترد کچھ بلینک تھے ایک ووٹ ہمارا مسترد ہوا ہے۔

علی حیدرگیلانی کاکہنا تھاکہ آصف زرداری بھاری اکثریت سے عوام کے ووٹوں سے صدر بنے ہیں۔آصف زرداری واحد شخص ہیں جنہوں نے بطور صدر پر اپنے اختیارات اٹھارویں ترمیم کے ذریعے صوبوں کو دیئے ۔ پاکستان سے نفرت اور تقسیم کی سیاست کو ختم کرنا ہے۔

واضح رہے کہ صدارتی انتخابات میں حکمران اتحاد نے معرکہ مار لیا،آصف علی زرداری دوسری بار بھاری اکثریت سے صدرپاکستان منتخب ہو گئے۔

نومنتخب صدرمملکت آصف علی زرداری 2008سے 2013تک صدارت کے منصب پرفائز رہ چکے ہیں۔

حکمران اتحاد کے صدارتی امیدوار آصف علی زرداری کو پارلیمنٹ سے 255سے زائد جبکہ سنی اتحاد کونسل کے امیدوار محمود اچکزئی کو 119سے زائد ووٹ ملے ۔

حکمران اتحاد کے امیدوار آصف علی زرداری نے پنجاب اسمبلی سے 246 ووٹ حاصل کئے۔جبکہ سنی اتحاد کونسل کے امیدوار محمود خاں اچکزئی صرف 100 ووٹ ہی حاصل کر سکے،6 ووٹ مسترد کر دئیے گئے۔

بلوچستان اسمبلی سے حکمران اتحاد کے صدارتی امیدوار آصف علی زرداری نے 47جبکہ سنی اتحاد کونسل کے امیدوار نے کوئی ووٹ حاصل نہیں کیا۔

خیبرپختونخوا اسمبلی سے سنی اتحاد کونسل کے امیدوارمحمود خان اچکزئی نے 91الیکٹورل ووٹ جبکہ حکمران اتحاد کے صدارتی امیدوار آصف علی زرداری نے 17ووٹ حاصل کئے۔