رانی پور تشدد کیس میں قبرکشائی کے بعد ڈاکٹرزنے جوڈیشل میجسٹریٹ کی موجودگی میں فاطمہ کی لاش کا پوسٹ مارٹم مکمل کرلیا،جبکہ 10 سالہ فاطمہ کا علاج کرنے والے ڈسپنسر کو بھی گرفتار کرلیا گیا ہے۔

رپورٹ کے مطابق قبرکشائی کے بعد فاطمہ کاوالد آنسو نہ روک سکا اور آبدیدہ ہوگیا،ڈاکٹروں کی ٹیم نے معائنہ شروع کردیا ،ڈاکٹر ز کا کہنا ہے کہ فاطمہ کی باڈی نارمل حالت میں ہے،ڈاکٹرز نے جوڈیشل میجسٹریٹ کی موجودگی میں فاطمہ کی لاش کاپوسٹ مارٹم مکمل کرکے دوبارہ سپردخاک کردیا جبکہ میڈیا کو قبر سے دور کردیا گیا ہے۔

دوسری جانب پولیس ذرائع کے مطابق رانی پور میں پیراسدشاہ جیلانی کی حویلی کے اندر فاطمہ کا علاج کرنے والے ڈسپنسر کو گرفتار کرلیا گیا۔اسد شاہ جیلانی نے تفتیش کے دوران مقتولہ فاطمہ کا علاج کرنے والے ڈسپنسر امتیاز میراسی کا انکشاف کیا، جس کے بعد اسے گرفتار کیا گیاہے۔

Advertisements

رانی پور کا ڈسپنسر امتیاز میراسی حویلی میں فاطمہ کا علاج کرنے کے لیے آتا رہا ہے۔ امتیاز سے تفتیش کے دوران کیس کے سلسلے میں انکشافات کی توقع ہے۔ پولیس نے ڈسپنسر امتیاز میراسی کو گرفتار کرکے نامعلوم مقام پر منتقل کردیا۔