مرا انگوٹھا کہاں لگے گا؟

میں ایک ناخواندہ شخص

لایا گیا ہوں جکڑا ہوا سلاسل سے

اُس عدالت میں ۔۔

جس کا قانون، ضابطہ، دھرم شاستر

شرع و شریعت ۔۔ مرے لیے حرف معتبر ہے!

مگر میں جاہل گنوار، اس عدلیہ کے دستور سے معرا

بنائے دعوئی، جواب دعویٰ سے بے خبر

نیک و بد سے غافل کھڑا ہوا ہوں ۔۔

میں ایک ناخواندہ شخص ۔۔ تقدیر کے مُحرر سے پوچھتا ہوں

مرا جو اقبال جرم آپ نے لکھا ہے مجھے یقیں ہے ، صحیح ہوگا

میں کتنے جنموں سے اپنے ناکردہ جرم سارے

قبول کرتا ہوا چلا آ رہا ہوں خود ہی

تو اب بھلا اس جنم میں کیا اعتراض ہو گا؟

Advertisements

مجھے بتائیں، مرا انگوٹھا کہاں لگے گا؟