امریکی خفیہ دستاویزات افشا کرنے والے مشتبہ شخص کو گرفتار کرلیا گیا۔

امریکی میڈیا رپورٹس کے مطابق ملزم کی شناخت ریاست میساچوسٹس کے ائیرنیشنل گارڈز کے رکن جیک ٹیکسیرا کے طور پر ہوئی ہے۔

جیک ٹیکسیرا کو ایف بی آئی نے میساچوسٹس سے گرفتار کیا، ایف بی آئی کے مطابق یوکرین جنگ سے متعلق خفیہ دستاویزلیک کرنیوالے جیک کو آج ہی عدالت میں پیش کیا جائے گا۔

رپورٹس کے مطابق ملزم اس آن لائن گروپ کا لیڈر ہے جس پر دستاویز جاری کی گئی تھیں، ایف بی آئی کی جانب سے ملزم کے گھر پر بھی چھاپہ مارا گیا۔

امریکی محکمہ دفاع پینٹاگون کا کہنا ہے کہ ملزم نے جان بوجھ کر مجرمانہ اقدام کیا۔

امریکی اخبار نیویارک ٹائمز کے مطابق ائیرمین گارڈز کارکن 21 سالہ جیک ٹیکسیرا 20 سے 30 افراد پر مشتمل ٹھگ شیکر سینٹرل نامی آن لائن گروپ کی قیادت کرتا ہے، اس آن لائن گروپ پر بندوقوں، ویڈیو گیمز سے دلچسپی کے پیغامات اورنسل پرستانہ میمز شیئر کیے جاتے ہیں۔

امریکی محکمہ انصاف نے افشا ہونے والی خفیہ دستاویزات کی تحقیقات کا پچھلے ہفتے آغاز کیا تھا، پینٹاگون کی خفیہ دستاویزات انسٹنٹ میسجنگ پلیٹ فارم ڈسکورڈ پر شیئر کی گئی تھیں۔

واضح رہے کہ گزشتہ دنوں امریکا اور نیٹو کا خفیہ منصوبہ سماجی رابطوں کی ویب سائٹ پر جاری کیا گیا۔

امریکی منصوبے میں روس پر حملے کے لیے یوکرین کو مسلح کرنے سے متعلق معلومات شامل تھیں، جنگی منصوبے میں یوکرینیوں کی غیرمعمولی اموات کا ذکر کیا گیا۔

رپورٹس کے مطابق ان دستاویزات میں دعویٰ کیاگیا کہ جنگ میں اب تک 71 ہزار 500 یوکرینی فوجی ہلاک ہوچکے ہیں جبکہ جنگ میں 16ہزار سے17ہزار روسی فوجی ہلاک ہوئے ۔

خفیہ دستاویزات میں دعویٰ کیا گیا کہ یوکرین کی 12 میں سے 9 بریگیڈ امریکا نے مسلح کیں۔