پنجاب بھر میں شہریوں کی سہولت اور آٹا تقسیم سنٹرز پر رش کم کرنے کیلئے نگران وزیراعلیٰ پنجاب نے اہم فیصلہ کیا ہے۔ جس کے تحت کل سے صوبہ بھر میں آٹا تقسیم مراکز صبح 6 بجے کھولے جائیں گے۔

تفصیلات کے مطابق نگران وزیراعلیٰ پنجاب محسن نقوی کی زیر صدرات اجلاس منعقد کیا گیا۔ پنجاب بھر میں شہریوں کی سہولت اور رش کم کرنے کیلئے مفت آٹے کے سنٹرز کو صبح 6 بجے کھولنے کا فیصلہ کیا گیا۔ کل سے صوبہ بھر میں آٹا ڈسٹری بیوشن سنٹر صبح 6 بجے کھلیں گے۔

اس موقع پر نگران وزیراعلیٰ پنجاب کا کہنا تھا کہ صوبائی وزراء اور سیکرٹریز اگلے 3 روز تک تفویض کردہ اضلاع میں فرائض سرانجام دیں گے۔ صوبائی وزراء اور سیکرٹریز آٹا سنٹرز کے وزٹ کرکے خود صورتحال کا جائزہ لیں گے۔ ڈی پی اوز اور ڈپٹی کمشنرز بھی صبح کے وقت سنٹرز پر موجود رہیں گے۔

محسن نقوی نے آٹا سنٹرز پر اضافی پولیس کی نفری تعینات کرنے کی ہدایت کردی۔ نگران وزیراعلیٰ محسن نقوی نے ساہیوال اور بعض دیگر شہروں میں آٹا سنٹرز پر دھکم پیل کے واقعات پر اظہاربرہمی کیا۔

نگران وزیراعلیٰ نے سنٹرز پر آنے والے شہریوں کی بہتر انداز سے مینجمنٹ کرنے کی ہدایت کردی۔ انہوں نے کہا کہ سنٹرز پر شہریوں کو مناسب طریقے سے گائیڈ کیا جائے اور قطاریں بنانے کے اعلانات کئے جائیں۔

اجلاس میں وزیراعلیٰ کو بریفنگ میں بتایا گیا کہ اب تک پنجاب بھر میں تقریباً ایک کروڑ 32 لاکھ آٹا تھیلے شہریوں میں تقسیم کئے جا چکے ہیں۔ صبح سے اب تک آج کے روز 21 لاکھ سے زائد آٹا تھیلے شہریوں کو فراہم کیے جاچکے ہیں۔ آج کم وقت میں سب سے زیادہ آٹا تھیلے تقسیم کئے گئے ہیں۔