محکمہ موسمیات نے ملک بھر میں بارش اور برفباری کے باعث موسم سرد رہنے کی پیشگوئی کر دی ہے۔

رپورٹ کے مطابق ملک کے بیشتر علاقوں میں موسم سرد اورخشک رہے گا جبکہ مغربی اور بالائی اضلاع میں مطلع ابر آلود رہے گا۔ بالائی خیبر پختو نخوا، گلگت بلتستان ،کشمیر اور شمالی بلوچستان میں بارش اور برفباری کی توقع کی جا رہی ہے۔ پنجاب اور خیبر پختونخوا کے میدانی علا قوں اوربالائی سندھ میں شدیددھند کا امکان ہے۔ کم سےکم درجہ حرارت لیہ میں منفی 08،گوپس، ہنزہ منفی 07، پاراچنار منفی06،ریکارڈ کیا گیا ہے۔ اسکردو منفی04، استور، مالم جبہ، بگروٹ اور ژوب میں منفی 03ڈگری سینٹی گریڈ ریکارڈ کیا گیا ہے۔

پیر کو جاری ایک بیان میں محکمہ موسمیات کا کہنا تھا کہ 10 سے 11 جنوری کے دوران بلوچستان میں کوئٹہ، ژوب، بارکھان، زیارت، نوکنڈی، دالبندین، چمن، قلعہ سیف اللہ اور ہرنائی سمیت متعدد علاقوں میں بارش اور برف باری کا امکان ہے۔اس کے علاوہ 11 سے 13 جنوری کے درمیان مری، گلیات، کشمیر، گلگت بلتستان، چترال، دیر سوات، مالاکنڈ، کوہستان، مانسہرہ اور ایبٹ آباد میں بھی مختلف مقامات پر بارش اور شدید برفباری متوقع ہے۔

محکمہ موسمیات کے مطابق 11 سے 13 جنوری کے درمیان صوبہ پنجاب کے بیشترعلاقوں بشمول میانوالی، خوشاب، بھکر، لیہ، فیصل آباد، ٹوبہ ٹیک سنگھ، جھنگ، گجرانوالہ، حافظ آباد، سیالکوٹ، شیخوپورہ، لاہور اور ساہیوال میں بھی بارشیں متوقع ہیں۔

محکمہ موسمیات نے خبردار کیا ہے کہ پاکستان کے پہاڑی علاقوں بشمول مری، ناران، کاغان اور سوات میں شدید برف بادی کے سبب سڑکیں بند ہو سکتی ہیں جس کے باعث گاڑیوں کی آمد و رفت میں خلل پڑ سکتا ہےجبکہ خیبر پختونخوا کے بالائی علاقوں، کشمیر اور گلگت بلتستان میں لینڈ سلائیڈنگ کے خدشات بھی موجود ہیں۔

بارشوں کے باعث پنجاب اور ملک کے دیگر علاقوں میں چھائی دھند میں کمی آئے گی اور پنجاب اور خیبر پختونخوا میں یہ بارشیں فصلوں کے لیے فائدہ مند ثابت ہوں گی۔