آزاد کشمیر میں 31 سال کے بعد پانچویں بلدیاتی انتخابات کے پہلے مرحلے میں مظفر آباد ڈویژن کے تین اضلاع میں ووٹنگ کا آغاز ہوگیا ہے۔

مظفرآباد، نیلم اور جہلم ویلی میں شروع ہونے والی پولنگ کا عمل شام 5 بجے تک بغیر کسی وقفے کے جاری رہے گا۔

مظفرآباد ڈویژن میں کل 6 لاکھ 95 ہزار 49 ووٹرز ہیں جن میں سے خواتین ووٹرز کے تعداد 3 لاکھ 20 ہزار 747 اور مرد ووٹرز کی تعداد 3 لاکھ 74 ہزار 302 ہے۔

مظفر آباد ڈویژن میں 614 بلدیاتی نشستوں پر 31 خواتین سمیت 2 ہزار 725 امیدوار انتخابات میں حصہ لے رہے ہیں جبکہ 19 امیدوار بلا مقابلہ منتخب ہوچکے ہیں۔

انتخابات میں تحریک انصاف کے 575، پیپلز پارٹی آزاد کشمیر کے 545 اور مسلم لیگ ن کے 465 امیدوار انتخابی میدان میں اترے ہیں جبکہ آزاد کشمیر کی سب بڑی سیاسی جماعت مسلم کانفرنس کے صرف 113 امیدوار انتخابات میں حصہ لے رہے ہیں۔