پچھلے مضمون وچ اساں ویکھیا سی کہ وارث پنجاب دی مسلسل تباہی دا شکوہ کردے ہین ہن ایہ ویکھاں گے کہ او کیہڑے کیہڑے کردار گنواندے نیں سب توں پہلاں پاکستانی ریاست دے ہیرو تے پنجابیاں دے ولن احمد شاہ ابدالی بارے اوہنا دے وچار
: پھرے چھنک دی چاؤ دے نال جٹی چڑھیا غضب دا کٹک قندھار وچوں
:
: دینا بیگ نوں مگر جیئوں پئے غلزئی ڈیرہ لٹ کے چاء کنگال کیتو
احمد شاہ وانگوں میرے مگر پے کے پٹ ٹھڈ کے چک دا تال کیتو
: حکم ھور دا ھور اج ھو گیا اج ملی پنجاب قندھاریاں نوں
کڑیاں پنڈ دیاں بیٹھ کے دھڑا کیتا لینی اج قندھار پنجابیاں جی
: وانگ کابلی کتیاں گرد ھوئیاں دو دو علی الحساب لگا گئیاں
فوجاں شاہ دیاں وارثا مار متھرا ڈھو پھیر لہور نوں آئیاں نیں
دو شعراں وچ او صاف صاف ابدالی نوں ننددے نیں
پہلے وچ کہندے نیں کہ توں ابدالی وانگ میرے مغر پے کے مینوں اینج کنگال کیتائے جیویں کھوہ دی لکڑ پٹ کے کھوہ دے تل یعنی زمین تے سٹ دتی جائے دوجے شعر وچ او ابدالی دے متھرا تے حملے تے بربادی دا ذکر کردے نیں ہندوواں دے مقدس شہر متھرا تے ابدالی دے حملے تے غزنوی دے سومنات تے حملے وچکار کہانی اکو ای اے دھرم دے ناں تے حملہ آور دھرم لئی مقدس شہراں نوں ہی نئیں چھڈدے وارث شعر دے دوجے حصے وچ “ڈھو پھیر” دی ترکیب ورتدے نیں ایہ بڑی اہم اے ایس دا مطلب ایہ وے کہ حملہ آور ہجے نئیں رجیا او دوبارہ لہور نوں لٹے گا
اگلے مصرعیاں وچوں دو ایہو جئے نیں جنہاں وچوں اک وچ پنجاب قندھاریاں نوں ملن دا ذکر ھے یعنی کہ ابدالی دیاں فوجاں نے پنجاب فتح کر لیئا ھے پر دوجے وچ او پنڈ دیاں کڑیاں کولوں اکھواندے نیں کہ کڑیاں نے آپسی مشورہ کیتا ھے کہ اسیں قندھار فتح کرنی ھے وارث دے لفظاں وچ کہانی پنجاب دی فتح توں شروع ھوئی فیر جواباً پنجابیاں ولوں قندھار فتح کرن دی خواہش کیتی گئی تے تیجا مصرعہ نال رلائیے تے “کابلی کتیاں ” دی ترکیب توں اوہنا دی حملہ آوراں توں نفرت دا حساب لایا جا سکدائے
وارث شاہ نے نادر شاہ درانی بارے جو آکھیا او دو مصرعیاں وچ ملدائے
نادر شاہ تھوں ہند پنجاب تھڑکے میرے باب دا تدھ بھونچال کیتو ”
قتل باش جلاد سوار خونی نکل دوڑیا ارد بازار وچوں ”
پہلے شعر وچ وارث ہوریں نادر شاہ کولوں ہند پنجاب دے تھڑکن یعنی خوفزدہ ھوون دا ذکر کردے نیں کہ توں میرے وجود وچ زلزلہ لے آؤندا اے جیویں نادر دے آون نال ھویا سی ۔ ایتھے اک ہور گل گوہ کرن والی ھے کہ وارث نے ہند پنجاب دی ترکیب ورتنی شروع کیتی ایس توں پہلاں ہند سندھ دی ترکیب عام سی جیہڑی وارث نے صرف اکو تھاں ورتی اے
گھوڑے اوٹھ ہاتھی دم توپخانے ہند سندھ تے حکم چلا میاں”
ایتھوں پتا چلدائے کہ وارث دے دور تائیں پنجاب اک سیاسی اکائی دے طور الگ پچھان بنا چکیا سی ۔ ہند پنجاب دی ترکیب وارث ھوراں نے دو تھاں تے ورتی اے ۔
قتل باش سوار جلاد خونی ” والے مصرعے وچ غالباً دلی دے قتلِ عام ول اشارہ اے جدوں نادر دے قزلباش سپاہی عوام دے سر دھڑ توں وکھ کر رہے سن ۔
جاری ھے