فلسطین کے شہر غزہ میں ایک مکان کے اندر آگ لگنے سے سات بچوں سمیت 21 افراد جاں بحق ہوگئے۔

غیرملکی میڈیا کے مطابق جبالیہ مہاجر کیمپ میں چار منزلہ عمارت میں دوران پارٹی آگ لگنے سے متعدد افراد جھلس کر زخمی بھی ہوئے ہیں جنہیں ہسپتال منتقل کردیا گیا ہے۔

فلسطینی حکام کے مطابق ابتدائی تحقیقات سے معلوم ہوا ہے کہ عمارت کے اندر بڑی مقدار میں پٹرول ذخیرہ کیا جارہا تھا، جس سے آگ بھڑک اٹھی اور تیزی سے پوری عمارت کو اپنی لپیٹ میں لے لیا۔

فلسطین کے صدر محمود عباس نے افسوس ناک واقعے کو قومی سانحہ قرار دیتے ہوئے سوگ منانے کا اعلان کیا ہے۔

Advertisements

غیرملکی میڈیا کے مطابق غزہ کو اس وقت توانائی کے بحران کا سامنا ہے، سردیوں میں لوگ بڑی تعداد میں کوکنگ آئل، پیٹرول اور ڈیزل کا ذخیرہ کرتے ہیں۔