امام علی علیہ السلام کا قول ہے کہ کفر کے ساتھ نظام چل سکتا ہے، ظلم کے ساتھ نہیں۔ ظلم کے خاتمے کیلئے جہاں اچھے حکمران کا ہونا لازمی ہے وہیں بہتر نظامِ عدل انصاف کا ضامن ہے۔لیکن بدقسمتی سے گلگت بلتستان کی 75 سالہ نامکمل تاریخ میں اس خطے کونہ اچھے حکمران نصیب ہوئے اور نہ نظامِ عدل۔ لیکن یہ بھی ایک حقیقت ہے کہ بقول شاعر مشرق علامہ کے “ذرا نم ہو تو یہ مٹی بہت زیر خیر ہے ساقی”۔

گزشتہ دنوں اسلام ا ٓباد میں 9ویں بین الاقوامی جوڈیشل کانفرنس سے خطاب کرتے ہوئے قائم مقام چیف جسٹس آف سپریم اپلیٹ کورٹ گلگت بلتستان وزیر شکیل احمد نے خطاب کیا۔ یہ پہلا موقع تھا کہ گلگت بلتستان کی مقامی عدالت عالیہ کے سربراہ کو اس قسم کی اہم کانفرنس میں خطے کا مقدمہ پیش کرنے کا موقع ملا جو کہ انتہائی نیک شگون ہے۔

اپنی تقریر میں جہاں اُنہوں نے گلگت بلتستان میں عدلیہ سے متعلق پیچیدہ مسائل کی نشاندہی کی، وہیں خطے کی 75 سالہ سیاسی محرومیوں کا بھی بلاوسطہ ذکر کیا۔اُنہوں نے کہا کہ خطے میں واحد ایک چیف جج ہوں جس کی وجہ سے کیسز کا انبار لگ چکا ہے۔ انہوں نےچیف جسٹس آف پاکستان سے شکوہ کیاکہ گلگت بلتستان میں ججز کی پنشن اور مراعات ایک جج کے برابرنہ ہونے سے قانون کی فراہمی متاثر ہو رہی ہے۔لہذا اپیلیٹ کورٹ میں خالی آسامیوں پر ججز تعینات کیے جائیں ،ججز کی تعیناتی مراعات اور پنشن کو ریگولرائز کرایا جائے۔ اُنہوں نے مزید کہا کہ خطے میں عدلیہ قانون کی بالادستی میں اپنا کردار ادا کرنے سے قاصر ہے اور یہاں آج بھی نہ کوئی آئین ہے اور نہ آئینی ضمانت کے تحت بنیادی حقوق ہیں اور نہ ہی آزاد عدلیہ موجود ہے۔

بدقسمتی سے اُن کے اس اہم ترین خطاب کو مقامی میڈیا میں خاص پذیرائی نہیں ملی ۔لیکن سوشل میڈیا پر اُ نکی تقریر کا کچھ حصّہ بہت وائرل ہوا ۔ سماجی رابطے کی ویب سائٹ فیس بُک،ٹیوٹر وغیرہ پر گلگت بلتستان کے کئی اہم سیاسی رہنماؤں اور وکلاء، سوشل ایکٹوسٹ نے اُنکی تقریر کا مخصوص حصہ شیئر کرکے جہاں اُنہیں زبردست خراج تحسین پیش کیا ہے وہیں عوامی حلقوں نے مطالبہ بھی کیا ہے کہ گلگت بلتستان کی تمام عدالتوں میں مقامی جج تعینات ہونا چاہیے۔ سوشل میڈیا پر زیادہ تر لوگوں کی رائے ہے کہ پہلی بار گلگت بلتستان کی اعلیٰ عدالت کے سربراہ کی جانب سے اہم کانفرنس میں وہ باتیں جو عمومی طور پر گلگت بلتستان میں کرنا ایک طرح سے ممنوع اور مشکوک سمجھی جاتی ہیں ۔اس قسم کی باتیں کرنے والوں کو قوم پرست کہہ کر نظر انداز کیا جاتا ہے، اور ایسا کرنا یقیناً بہادری اور دھرتی سے وفاداری کی عظیم مثال ہے۔ یہ بات ایک حقیقت ہے کہ گلگت بلتستان میں قانون کی بالادستی کیلئے مقامی سیاسی پارٹیوں کی طویل جدوجہد رہی ہے یہی وجہ ہے کہ آج مسئلہ گلگت بلتستان مسئلہ کشمیر کی اہم کنجی کے طور پر اُبھر کر سامنے آیا ہے۔

پس چیف جسٹس کےخطاب سے اسمبلی کے ممبران کے اُن بلند وبانگ دعوؤں کی نفی ہوگئی جو اپنی مراعات و مفادات کیلئے ہمیشہ یہی کہہ رہے ہوتے ہیں کہ گلگت بلتستان میں ایک بااختیار حکومت ہے اور اپنے فیصلے ہم خود کرتے ہیں۔کیونکہ جہاں عدالت انصاف دینے میں ناکام ہو، سیاسی نظام باختیار ہونے کی باتیں خام خیالی اور فریب ہے اور اس بات کا اقرار سابق اسپیکر سمیت کئی ممبر اسمبلی اخباری بیانات کے ذریعے کرچکے ہیں ،کہ گلگت بلتستان میں دراصل بیوروکریسی ہی پورے نظام پر حاوی ہے ۔ حقیقت یہ ہے کہ ہماری اسمبلی کی تاریخ ہے کہ یہاں سے مسئلہ کشمیر اور اس حوالے سے اقوام متحدہ کی قراردادوں اور ریاستی موقف آئین پاکستان کے آرٹیکل 257 اور آرٹیکل 1 کے تناظر میں گلگت بلتستان کیلئے حقوق مانگنے کے بجائے ذاتی خواہشات کی بنیاد پر آج تک قرارداد پاس کرتے رہے ہیں جسکا نتیجہ آج تک صفر ہے۔ ورنہ یہ بات اب روز روشن کی طرح عیاں ہوچُکی ہے کہ گلگت بلتستان کو صوبہ بنا نا اس قدر آسان نہیں، جس طرح سے مقامی سطح پر سمجھا جاتا ہے۔

اس حوالے سے سپریم کورٹ آف پاکستان کے کئی اہم فیصلے موجود ہیں جس میں خطے میں ٹیکس کے نفاذ کے خلاف 1994ء میں ایک آئینی درخواست جو الجہاد ٹرسٹ فیصلہ کے نام سے مشہور ہے۔ اس آئینی پٹیشن پہ سپریم کورٹ کے سابق چیف جسٹس اجمل میاں کی سربراہی میں ایک لارجر بنچ نے سال 1999ء میں فیصلہ دیکر حکو مت پاکستان کو حکم دیا تھا کہ وہ خطے کے عوام کو اپنے منتخب نمائندوں کے ذریعے اپنے اوپر خود حکومت کرنے کا اختیار دیں اور یہاں کے عوام کے بنیادی حقوق کے تحفظ کو یقینی بنانے کیلئے آئینی گارنٹی کے ساتھ ایک آزاد خودمختار عدلیہ قائم کی جائے۔ سپریم کورٹ نے وفاق پاکستان کو چھ ماہ کے اندر اس فیصلے پہ عمل درآمد کرنے کا حکم دیا تھا۔