ہم گذشتہ نشست میں امام خمینیؒ کے تفسیری منہج کے چند پہلوئوں کا اجمالی ذکر کرچکے ہیں۔ آج کی نشست میں اس حوالے سے کچھ مزید مطالب پیش کریں گے اور امام خمینیؒ کی کتب، مکتوبات اور بیانات سے ماخوذ قرآنی حوالے سے جو کتابیں شائع ہوئی ہیں، ان کا بھی تعارف کروائیں گے۔

امام خمینیؒ کے تفسیر مطالب کے مصادر
جن کتابوں سے محققین و مرتبین نے امام خمینیؒ کے تفسیری مطالب کے لیے استفادہ کیا ہے، ان میں تفسیر سورہ حمد، شرح حدیث جنود عقل و جھل، آداب الصلاۃ، سر الصلاۃ، شرح چھل حدیث، کشف اسرار، مصباح الھدایہ، شرح دعای سحر اور صحیفہ امام شامل ہیں۔ اس سلسلے میں شائع ہونے والی تین کتب مندرجہ ذیل ہیں:
۱۔ تفسیر سورہ حمد
۲۔ تفسیر قرآن مجید برگرفتہ از آثار امام خمینیؒ
۳۔ تفسیر و شواہد قرآنی در آثار امام خمینیؒ
ان کتابوں کا مختلف زبانوں میں ترجمہ ہوچکا ہے اردو میں تفسیر سورہ حمد اور تفسیر و شواہد قرآنی کا ترجمہ ہمارے کتاب خانے میں موجود ہے۔ تفسیر شواہد قرآنی کا اردو ترجمہ جناب مولانا محمد علی توحیدی نے کیا ہے، جو دو جلدوں میں ہے۔ امام خمینیؒ کے آثار کی حفاظت اور نشر و اشاعت کے ذمہ دار ادارے ’’موسسہ تنظیم و نشر آثار امام خمینیؒ‘‘ نے یہ کتابیں شائع کی ہیں۔

امام خمینیؒ کے آثار میں ۱۱۴ میں سے ۹۱ سورتوں کے مطالب موجود ہیں۔ سورہ حمد سے متعلق مطالب نسبتاً تفصیل سے ہیں۔ آپ کی کتب میں سے جن سورتوں کے مطالب اخذ کیے گئے ہیں وہ یہ ہیں: سورہ فاتحہ، مریم، طہ، نور، نمل، لقمان، فاطر، یس، زمر، مؤمن، شوری، زخرف، جاثیہ، احقاف، ق، ذاریات، قمر، الرحمن، حشر، جمعہ، طلاق، تحریم، ملک، قلم، معارج، نوح، جن، مزمل، نباء، عبس، تکویر، انفطار، مطففین، طارق، غاشیہ، تکاثر، هھمزہ، ماعون، نصر، فلق اور ناس۔ آپ کے مکتوبات، پیغامات اور بیانات میں موجود تفسیری مطالب مندرجہ ذیل سورتوں کی آیات سے متعلق ہیں: سورہ اعلی، شمس، ضحی، عصر، بقرہ، آل عمران، نساء، مائدہ، انفال، هھود، مؤمنون، فتح، حجرات، یونس، رعد، صف اور فجر۔

امام خمینیؒ کے تفسیری مطالب کے کلی موضوعات
مرتبین نے امام خمینیؒ کے تفسیری مطالب کو مختلف پہلوئوں کے تحت ذکر کیا ہے۔ مثلاً:
* عرفانی و اعتقادی پہلو
* اخلاقی و تربیتی پہلو
* سیاسی و انقلابی پہلو

امام خمینیؒ اور تفسیر عرفانی
پہلی قسم کی تفسیر میں اس طرح کے الفاظ و اصطلاحات کو استعمال کیا گیا ہے:
تحقیق عرفانی، ایقاظ ایمانی، تنبیہ اشراقی، اشراق عرفانی، تنبیہ ایمانی اور تنبیہ عرفانی وغیرہ۔ تاہم عرفانی پہلو سے بات کرتے ہوئے بعض شرعی احکام بھی ’’فرع فقہی‘‘ کے عنوان سے بیان کیے گئے ہیں۔ بعض مقامات پر عرفانی مطالب عام قارئین کی دسترس سے ماورا معلوم ہوتے ہیں، لیکن بعض مقامات پر آپ نے نسبتاً عام فہم انداز سے ان مطالب کو پیش کیا ہے۔ مثلاً آپ کہتے ہیں کہ اللہ کی یہ عظیم کتاب عالم غیب اور قُربِ ربوبی سے نازل ہوئی ہے، تاکہ ہم ہجرت زدگان اس سے استفادہ کریں۔ ہم کہ جو عالم طبیعت کے قیدی ہیں، اس کی مدد سے رہائی پائیں اور ہوائے نفس اور لفظ و کلام کی زنجیروں میں جکڑے ہوئے لوگ اس کی مدد سے آزادی حاصل کریں۔ یہ اللہ کی رحمت مطلق کے عظیم ترین مظاہر میں سے ہے، جس سے ہم اندھوں اور بہروں نے کچھ استفادہ نہیں کیا اور نہ استفادہ کرتے ہیں۔(آداب نماز، ص۶۶)

آپ کہتے ہیں کہ اہل معرفت کے نزدیک یہ کتاب حق تعالیٰ کے ذاتی و صفاتی و فعلی مراتب کے مبداء سے تمام تر جمالی و جلالی تجلیات کے ساتھ نازل ہوئی ہے۔ دیگر آسمانی کتب کو یہ مرتبہ و منزلت حاصل نہیں۔(آداب نماز) ایک اور مقام پر کہتے ہیں کہ قرآن نے تنزل کیا ہے، نیچے آیا ہے اور قلب رسولؐ پر نازل ہوا ہے اور وہاں سے پھر نازل ہوا ہے اور نیچے آیا ہے، تاکہ سب تک پہنچ جائے اور سب لوگ سمجھ جائیں۔(سورہ حمد) امام خمینیؒ کہتے ہیں کہ اس کا مطلب یہ ہے کہ قرآن نے سات مرحلوں میں تنزل کیا ہے، تاکہ قابل فہم ہو جائے اور سادہ تر ہو جائے۔ قرآن میں بھی یہ بات آئی ہے کہ قرآن سات حرفوں پر نازل ہوا ہے۔ مشکل مطالب میں سے ہم بطور مثال ایک جملہ نقل کرتے ہیں، جو شاید اہل عرفان کے لیے آسان مطالب میں سے ہو: ’’قرآن سِر است، سرِ سراست، سر مستتربہ سر است۔‘‘

امام خمینیؒ اور تفسیر اخلاقی و تربیتی
امام خمینیؒ کی تمام تر توجہ انسان کی روحانی بالیدگی اور انسان کو بلند روحانی مقام کی طرف دعوت دینے کی طرف ہے، کیونکہ وہ سمجھتے ہیں کہ اللہ کے رسولوں کی سب سے بڑی ذمہ داری انسانوں کو مقام روحانی تک پہنچانا ہے۔ تمام انبیاء کی کوشش رہی ہے کہ وہ انسانوں کو حیوانی مرحلے سے نجات دے کر انسانیت کی بلند چوٹی پر پہنچا دیں۔ امام خمینیؒ کے نزدیک تربیت کا مسئلہ تعلیم سے بالاتر ہے۔ وہ کہتے ہیں کہ تزکیہ نفس کی اہمیت تعلیمِ کتاب و حکمت سے زیادہ ہے۔ اسی لیے قرآن کریم نے تزکیہ کو علم و حکمت کی تعلیم پر مقدم رکھا گیا ہے۔ یہ بات انھوں نے قرآن حکیم کی اس آیت کو پیش نظر رکھتے ہوئے کی ہے: هُوَ الَّذِیْ بَعَثَ فِی الْاُمِّیّٖنَ رَسُوْلًا مِّنْهُمْ یَتْلُوْا عَلَیْهِمْ اٰیٰتِهٖ وَ یُزَكِّیْهِمْ وَ یُعَلِّمُهُمُ الْكِتٰبَ وَ الْحِكْمَةَۗ(جمعہ۔۲)

وہ کہتے ہیں ایسا نہیں کہ کسی عام مصنف کی طرح اللہ تعالیٰ نے تقدم و تاخر کو ملحوظ رکھے بغیر بیان کر دیا ہو۔ وہ کہتے ہیں کہ کبھی علم انسان کو جہنم میں لے جاتا ہے۔ کبھی علم توحید بھی انسان کو جہنم میں لے جاتا ہے۔ کبھی علم اخلاق انسان کو جہنم میں لے جاتا ہے، کبھی علم عرفان انسان کو جہنم میں لے جاتا، کبھی علم فقہ انسان کو جہنم میں لے جاتا ہے۔ انسان کی اصلاح علم سے نہیں ہوتی، اسے تزکیے کی ضرورت ہوتی ہے، اسی لیے’’ یُزَكِّیْهِمْ‘‘ کو ہر چیز پر مقدم رکھا گیا ہے۔

امام خمینیؒ و تفسیر سیاسی و انقلابی
امام خمینیؒ نے قرآنی آیات ہی سے حکومت، سیاست، قیام عدل، جنگ، امن، آزادی، بنیادی حقوق، جزا و سزا کے احکام، ملک کے نظام کا دفاع اور بیرونی تسلط کے خلاف جہاد جیسے موضوعات کے لیے استفادہ کیا ہے۔ امام خمینیؒ قرآن حکیم کو سراسر قیام عدل کی دعوت سمجھتے ہیں۔ وہ قرآن کے فرعی و عبادی احکام کو بھی سیاسی و اجتماعی پہلوئوں کا حامل قرار دیتے ہیں۔ وہ قرآن کو ظالموں اور استعماری قوتوں کے خلاف کتاب جنگ و جہاد سمجھتے ہیں۔ وہ کہتے ہیں کہ یہ کتاب عدل کے قیام کے لیے نازل ہوئی ہے۔ ان کی نظر میں قرآن کریم نے حکومت عدل کے قیام کو عظیم ترین واجبات اور بلند ترین عبادات میں سے قرار دیا ہے۔ وہ اپنے ایک بیان میں کہتے ہیں کہ قرآن میں اجتماعی امور اور عبادی امور سے متعلق آیات میں ننانوے اور ایک کی نسبت ہے بلکہ اس سے بھی زیادہ۔ اپنی زندگی کے آخری برسوں میں آپ نے زیادہ تر قرآن سے اجتماعی و سیاسی مسائل اخذ کرتے ہوئے عصری مسائل کا حل پیش کیا ہے اور ان کی وضاحت قرآن حکیم کی روشنی میں کی ہے۔ اس سلسلے میں دفاع اور اقتصاد سے متعلق مسائل خاص طور پر قابل ذکر ہیں۔ بینکوں کے سود کے حوالے سے بھی آپ نے قرآن حکیم کی آیات کی مدد سے اپنا نقطہ نظر پیش کیا ہے۔