پاکستانی حکومت نے پیٹرولیم مصنوعات کی قیمتوں میں ایک بار پھر بڑا اضافہ کر دیا ہے، پیٹرول اور ڈیزل کی قیمتوں میں 30 روپے اضافہ کے بعد نئی قیمت 209.30 پیسے فی لیٹر ہو گئی ہے۔

تاہم اس وقت دنیا میں سب سے سستا اور مہنگا پیٹرول کہاں ملتا ہے؟

دنیا بھر میں سب سے سستا پیٹرول اس وقت وینزویلا میں ہے جہاں اس وقت ایک لیٹر کی قیمت پاکستانی روپوں میں ساڑھے چار روپے فی لیٹر ہے، ایران میں ایک لیٹر پیٹرول 10 روپے 74پیسے میں مل رہا ہے، شام میں پیٹرول فی لیٹر57 روپے میں دستیاب ہے۔ ملائیشیا میں فی لیٹر پیٹرول 94روپے میں فروخت ہورہا ہے۔

تیل کے ذخائر سے مالا مال قطر میں بھی یہ قیمت 116 روپے فی لیٹر تک پہنچ چکی ہے، سعودی عرب میں ایک لیٹر پیٹرول 125 روپے میں فروخت ہو رہا ہے، دبئی سمیت عرب امارات میں یہ قیمت 194 روپے تک پہنچ چکی ہے۔ افغانستان میں پیٹرول کی قیمت 173روپے سے زائد ہے۔

ورلڈ سپر پاور امریکا میں یہ قیمت 252 روپے فی لیٹر سے اوپر جا چکی ہے، بنگلا دیش میں 202روپے فی لیٹر پیٹرول فروخت ہوتا ہے، چین میں پیٹرول کی قیمت 281 روپے تک پہنچ چکی ہے۔ بھارت میں ایک لیٹر پیٹرول 270روپے میں فروخت ہورہا ہے۔ نیوزی لینڈ میں پیٹرول 401 روپے فی لیٹر خریدا جاتا ہے۔

برطانیہ میں پیٹرول کی قیمت 424 روپے ہوچکی ہے، دنیا میں سب سے مہنگا پیٹرول اس وقت ہانگ کانگ میں دستیاب ہے جہاں پیٹرول 588روپے 71پیسے فی لیٹر میں دستیاب ہے، واضح رہے کہ یہ صرف پیٹرول کی فی لیٹر قیمت کا موازنہ ہے، دنیا بھر کے ممالک میں پیٹرول کا اپنا معیار ، مقامی کرنسی کی ویلیو، وہاں کی فی کس آمدنی، لوگوں کا معیار زندگی اور مہنگائی کی شرح کی اہمیت اپنی اپنی جگہ ہے۔

مثلا ورلڈ بینک کے مطابق پاکستان میں فی کس آمدنی 100 ڈالرز ماہانہ ہے اور بھارت میں فی کس آمدنی 160 ڈالرز سالانہ ہے۔ امریکا میں3 ہزار ڈالرز کے قریب اورہانگ کانگ میں چار ہزار ڈالرز کے قریب ہے۔