لاعلمی کا بھوت اور کونسلنگ کی ضرورت۔۔تنویر سجیل

عام طور پرلوگوں کا کسی بھی قسم کی کونسلنگ لینے کے حوالے سے رویہ آج بھی قدامت پسندی، تنگ نظری اورغیر دانشمندانہ  ہی ہے جیسا کہ ساٹھ کی دہائی میں کسی کو یہ باور کروانا ہو کہ لوگ چاند پر پہنچ گئے ہیں اور اب ان کا اگلا ہدف خلائی ہوٹل بنانا اور خلائی سفر کو کمرشل کرنا ہے جس کے لیے سائنس ان کو راہ دکھا رہی ہے اور وہ جیسے جیسے علمی ترقی کی طرف جا رہے ہیں ویسے ویسے ان کے شعور اور وسعت نظر کا دامن وسیع تر ہوتا جا رہا ہے اور وہ باتیں جن کا خواب بھی دیکھنا آسان نہ تھا آج ان کی تکمیل کا دور چل رہا ہے۔

مگر یہ انسانی عقل بھی کیسا دھوکہ دیتی ہے کہ اکثر آنکھوں دیکھی حقیقت کو جھٹلا دینے سے بھی گریز نہیں کرتی اور تو اور اگر کوئی علم، آگاہی کی طرف متوجہ کرے بھی تو اس کو بھی خبطی اور پاگل قرار دے کر اپنے بے قرار دل کو قرار دلانے کی ناکام کوشش بھی عمدہ طریقے سے کر لیتی ہے۔

FaceLore Pakistan Social Media Site
پاکستان کی بہترین سوشل میڈیا سائٹ: فیس لور www.facelore.com

خیر بات ہو رہی تھی کونسلنگ اور اس کے حوالے سے رویوں کی بے رخی اور بے رحمی کی تو ہم مدعا پر بات کو آگے بڑھانے کے حوالے سے تھوڑا آگاہی کی طرف جاتے ہیں کہ آخر آج کل کونسلنگ اور کپل کونسلنگ کی ضرورت کیوں ہے اور کن لوگوں کو ہے تو اس بارے بہت سے سروے اور تحقیقات یکساں قسم کی معلومات فراہم کرتے ہیں کہ لوگ سمجھتے ہیں کہ کونسلنگ کی ضرورت صرف ان لوگوں کو ہے جو ذہنی بیمار یا پاگل ہیں جبکہ کپل کونسلنگ کے حوالے سے بھی کچھ ایسے ہی اندھے نظریات کا سامنا کرنا پڑتا ہے کہ کپل کونسلنگ کی ضرورت ہی کیا ہے اور اگر ہے بھی تو ہم کیوں اپنے مسائل گھر سے باہر کسی کو بتائیں تو ایسی سوچ صرف ان لوگوں کی ہو سکتی ہے جن کو کونسلنگ اور کپل کونسلنگ کا کوئی علم اور تجربہ بالکل بھی نہ ہو اور وہ اپنی فرض کی گئی باتوں سے خود تو گمراہ ہوتے ہی ہیں دوسروں کو بھی اپنی باتوں کے بہکاوے میں لے آتے ہیں اور سب سے حیران کن بات یہ ہے کہ ایسے لوگوں کی اکثریت تعلیم یافتہ افراد کی ہے جن کو لگتا ہے کونسلنگ سے کوئی فائدہ نہیں اور ان کی مثال وہی ہے کہ خود تو کبھی لاہور دیکھا نہیں اور لوگوں کو بھی بتاتے پھرتے ہیں کہ لاہور نہ ہی جانا ادھر دیکھنے لائق کچھ نہیں ہے۔

موجودہ ترقی یافتہ دور میں جبکہ علم و ہنر اب اپنے کمال کو پہنچ رہا ہے تو ایسے میں لوگوں کے اندر ایک عجب قسم کی کم علمی اور جہالت بھی اپنا مقام بلند کیے جارہی ہے ایسا لگتا ہے کہ علم کی فروانی کے ساتھ ساتھ عقل کی کمی کا کام برابر کی سطح پر چل رہا ہے جس پر سوشل میڈیائی دانش کا الگ سے اثر ہے کہ ادھر کسی نے ایک غیر تحقیق شدہ بات کہی ادھر سب نے اس کو عقل کے استعمال کئے بغیر قبول کر لیا اور اس کو دوسروں تک پہنچا کر ثواب دارین کی سعادت سے خود کو محروم نہ ہونے دیا۔

اب ذرا حقیقت پسندی سے مشاہدہ کریں اور جائزہ لیں تو بہت سے حقائق آنکھوں کے سامنے ناچنے لگیں گے کہ آج کے دور میں ایک تین سال کے بچے سے لے کر ستر سال کے بوڑھے ہوتے فرد کو کتنے سٹریس روز مل رہے ہیں، روز مرہ کی چھوٹی چھوٹی باتیں کیسے ان کے اندر پریشر کو بڑھا رہی ہیں اور ان کے ہیجان انگیز ردعمل کس حد تک عام سی صورتحال کو جذباتی یرغمال بنا لیتے ہیں۔

مگر یہ سب تو سب کو نظر آ رہا ہوتا ہے لیکن اس کے باوجود ان کی خود کی سوچ اور نظریات ان کے مناسب حل کے لیے ان کو پہلی رکاوٹ پیش کر رہے ہوتے ہیں اور اگر وہ حوصلہ کر بھی لیں اور کسی پروفیشنل کے پاس جائیں بھی تو گھر کے افراد سے لیکر معاشرہ ان کو ایسی ایسی احمقانہ باتوں سے ڈرانے لگ جاتے ہیں کہ وہ اس بات میں ہی عافیت سمجھتے ہیں کہ کسی پروفیشنل کی رہنمائی نہ ہی لی جائے مگر پھر مسائل اپنی جگہ ویسے ہی نہیں رہتے بلکہ ان کا اثر روز برورز بڑھتا جاتا ہے اور زندگی جینے میں رکاوٹ بنتا جاتا ہے۔

کونسلنگ اور کپل کونسلنگ ترقی یافتہ دنیا کی کوئی نئی اختراع نہیں ہے اگر تھوڑا حقیقت پسندانہ غور کریں تو کونسلنگ یا مشاورت کا کام ازل سے انسانی ضرورت رہا ہے جس کو پہلے وقتوں میں خاندان کے بزرگ اور بڑے انجام دیتے تھے کیونکہ ان کے پاس وسیع تجربہ ہوتا تھا اور ان کی رہنمائی ہر صورت میں بہترین ہوتی تھی۔

ایسے ہی نوبیاہتا جوڑے کو بھی نئی زندگی کے اس سفر کو بہتر انداز میں گزارنے کے لیے گھر کی خواتین اور بڑے ان کی ہر معاملے میں رہنمائی کیا کرتے تھے چونکہ ترقی کی دوڑ میں دوڑتے دوڑتے آج ہم ایسے دور میں داخل ہو گئے ہیں جس میں وہ اول وقتوں کی دانش اور فہم کا زمانہ ہی ہاتھ سے نکل گیا اور ہر کام اور ہنر کے لیے خاص قسم کے لوگوں کی تعلیم و تربیت کر کے تمام معاملات ان کے حوالے کر دیے جو اس تعلیم کے سند یافتہ ہوں اور ان کا شعبہ مخصوص کر کے ان سے وہی خدمات لئے جانے کے تصور کو عملی شکل دے دی گئی ہے۔

تو یہی وجہ ہے کہ کونسلنگ اور کپل کونسلنگ کو ترقی یافتہ دور کی نئی شکل سمجھ کر لوگ اس بات سے گریزاں ہیں کہ ان کو مشاورت کی ضرورت تو ہے مگر وہ ان پروفیشنل سے نہیں لینا چاہتے جس کی وجہ بھی کچھ ایسے نظریات ہیں جن کی تشکیل میں علم اور آگاہی کی کمی اور اس کے ساتھ ساتھ انا پسندی کی ضد ہے کہ ان کو ایسے پروفیشنلز کی ضرورت نہیں ہے جبکہ یہ صرف حقیقت سے فرار ہے جو زندگی کو مشکل بنا دیتا ہے۔

کیونکہ آج اگر آپ ایک نظر ذات کی تشنگی، سماجی افرا تفری، جذباتی بےہنگمی، اداسی، تنہائی اور پریشانی کے بڑھتے نادیدہ ہاتھوں، کپلز میں عدم برداشت و عدم مطابقت، فیملی پولیٹکس کے ہتھکنڈوں، سسرالی جارحیت، کپلز کی بلیک میلنگ، آئے روز کے معمولی جھگڑوں اور طلاق و خلع کے بڑھتے گراف پر ڈالیں تو   آپ کو یقین ہو جا ئےگا کہ کونسلنگ اور کپل کونسلنگ کن امراض کے علاج کے لیے ضروری ہے۔

اب اگر کچھ مزید مثبت انداز سے سوچیں تو آپ کو اس بات کو ماننے میں بھی کوئی ہچکچاہٹ نہیں ہو گی کہ کونسلنگ یا کپل کونسلنگ صرف بے رنگ رویوں، جذباتی بھدے پن اور دوسروں کے عمل کے نتیجے میں پیدا شدہ مسائل پر ہی مشاورت اور رہنمائی نہیں فراہم کرتی بلکہ یہ تو ایسے معاملات پر بھی رہنمائی فراہم کرتی ہے جن کا تعلق لائف میں کوالٹی لانے، خود کو مزید بہتر بنانے، ازدواجی خوشیوں کو بڑھانے، پرسکون انداز میں جینے اور زندگی کو تمام رنگوں سے رنگین کرنے سے متعلق ہوتے ہیں۔

Advertisements
julia rana solicitors london

تو سوال صرف یہی ہے کہ اگر آپ کسی بھی وجہ سے کونسلنگ یا کپل کونسلنگ کی ضرورت محسوس کرتے ہیں اور خود کے نظریات، دوسروں کی سوچ اور زمانے کے خوف سے مشاورت یا رہنمائی لینے کو رد کر رہے ہیں یا غیر ضروری سمجھ رہے ہیں تو سمجھ لیں آپ بھی اسی لاعلمی کا شکار ہو جائیں گے جس کے آگے زندگی کی خوشی کی گلی بند ہو جاتی ہے البتہ یہ ضرور کیجئے کہ اپنی کونسلنگ کی ضرورت کو ماہر نفسیات سے بات کر کے سمجھ لیجئے گا ویسے بھی آج اگر دنیا جہاں کی ہر شے گھر پر بیٹھے حاصل کر رہے ہیں تو کونسلنگ اور کپل کونسلنگ بھی آپ کو صرف ایک کال پر مل سکتی ہے۔

  • julia rana solicitors
  • julia rana solicitors london
  • merkit.pk
  • FaceLore Pakistan Social Media Site
    پاکستان کی بہترین سوشل میڈیا سائٹ: فیس لور www.facelore.com

بذریعہ فیس بک تبصرہ تحریر کریں

Leave a Reply