حقیقی آزادی کا خواب دیکھنا تو چاہیے لیکن بقول اقبال:
یہ شہادت گہِ الفت میں قدم رکھنا ہے
لوگ آسان سمجھتے ہیں مسلماں ہونا
ایک روحِ آزاد کو آزادی ہی کی تمنا سے سرشار رہنا چاہیے۔ اس سے کم تر تمنا ایک انسان کے لیے اپنے وجود کی کم تر قیمت لگانے کے مترادف ہے۔ آزادی جیسے ایک فرد کے لیے نعمت عظمیٰ ہے، اسی طرح ایک قوم کے لیے بھی یہی نعمت عظمیٰ ہے۔ آزادی یعنی ہر طرح کی غلامی سے نجات۔ لا الٰہ الا اللہ واقعاً انسان کو آزاد کر دیتا ہے۔ پھر اقبال یاد آتے ہیں:
وہ ایک سجدہ جسے تو گراں سمجھتا ہے
ہزار سجدے سے دیتا ہے آدمی کو نجات
خدا پرستی انسان کو ہر طرح کی غلامی سے آزاد کر دیتی ہے۔ کیسی خوبصورت پرستش ہے اور کیسی عظیم پرستش ہے، جو انسان کو ہزار طرح کی غلامی سے آزاد کر دیتی ہے، لیکن پھر وہی بات کہ آسان نہیں یہ فیصلہ کرنا کہ مجھے آزاد ہونا ہے اور آزاد رہنا ہے۔ اس کے لیے مشکلات اور سنگین مشکلات کے صحرائوں کو عبور کرنا ہوتا ہے۔

پاکستان کے موجودہ حالات کے تناظر میں حقیقی آزادی کے راستے میں حائل مشکلات کو سمجھنے کی ضرورت ہے۔ فیصلہ تو یہی کرنا چاہیے کہ ہم حقیقی آزادی سے کم پر راضی نہیں ہوں گے، لیکن اس کا حقیقی آزادی کا مطلب کیا ہے، اسے بھی ضرور جان لینا چاہیے۔ بقول جگر مراد آبادی:
یہ عشق نہیں آساں اتنا ہی سمجھ لیجے
اِک آگ کا دریا ہے اور ڈوب کے جانا ہے
ضروری ہے کہ خرد کے علاوہ روح بھی حقیقی آزادی کی تمنا کرے، کیونکہ:
خرد نے کہہ بھی دیا لا الہ تو کیا حاصل
دل و نگاہ مسلماں نہیں تو کچھ بھی نہیں

پاکستان کے جوانوں میں آج استعمار سے آزادی کی تڑپ کا جذبہ جس انداز سے موجزن ہے، ہم نے اپنی حیاتِ مستعار میں پہلے اس سطح پر اور اتنا ہمہ گیر نہیں دیکھا۔ علاوہ ازیں پاکستان کا حاکم نظام جس انداز سے استعمار کی گرفت میں ہے، یہ امر بھی کبھی اتنا آشکار نہیں ہوا، جتنا آج ہوچکا ہے۔ اس نظام کی سجی ہوئی باندیاں ہمارے روشن ضمیر جوانوں کے سامنے عریاں ہوچکی ہیں اور ہمارے جوانوں کو ان سے گھن آرہی ہے۔ وہ جان چکے ہیں کہ اس ملک کے نظام کے کون کون سے بنیادی عناصر ہیں اور وہ کس کس طرح سے غلامی کا فریضہ خشوع و خضوع سے انجام دے رہے ہیں۔ اس اٹھان اور بیداری کا ایک روشن پہلو یہ بھی ہے کہ یہ تقریباً پورے ملک میں اور ملک کے ہر گوشے میں ایک ہی سطح پر دکھائی دیتا ہے اور اس کے مظاہر ہم گذشتہ کئی دنوں سے دیکھ رہے ہیں۔

تاہم اس کے لیے یہ جاننا ضروری ہے کہ صرف عوام کی پسندیدہ حکومت کے برسراقتدار آنے سے منزل مراد نہیں مل جائے گی۔ اول تو استعمار کے غلام آسانی سے یہ کام کرنے نہیں دیں گے۔ انھوں نے فی الحال عوامی دبائو کی وجہ سے کچھ عقب نشینی اختیار کر بھی لی تو وہ پھر کسی اور انداز سے راستوں کو روکیں گے اور مشکلات پیدا کریں گے۔ اقتدار کی غلام گردشوں میں یہ کٹھ پتلیاں ہر طرف تماشا رچائے ہوئے ہیں۔ ان کی جڑیں بہت گہری ہیں۔ معرکہ بھی ہمہ گیر ہے، یہ لڑائی چومکھی ہے۔ اس کے لیے بہت زیادہ حوصلہ درکار ہے، بہت شعور چاہیے، مسلسل بیداری کی ضرورت ہے۔ ظرافت کاری، حکمت اور جہادی ولولہ درکار ہے۔ اس کے لیے تاریخ سے بھی سبق سیکھنا ہے اور معاصر دنیا میں جن قوموں نے آزادی کی تمنا لے کر جدوجہد کی ہے، ان کے تجربات کو بھی سامنے رکھنا ہے۔

اس امر کا امکان موجود ہے کہ حقیقی آزادی کا خواب دکھانے والی قیادت بظاہر پھر سے حکومت میں آنے میں کامیاب ہو جائے، لیکن پھر آنے والی مشکلات کے لیے اس کا خود تیار رہنا اور قوم کو بھی تیار رکھنا اور قوم کا مسلسل ایثار اور قربانی کے راستے میں آگے بڑھتے رہنا ناگزیر ہوگا۔ پاکستان پر نئی پابندیاں لگائی جاسکتی ہیں۔ پاکستان کے بینکوں پر بھی پابندیاں لگ سکتی ہیں، بیرون ملک موجود پاکستانیوں کو نکالا بھی جاسکتا ہے اور ان کی ترسیلات زر میں رکاوٹیں بھی پیدا کی جاسکتی ہیں۔ مہنگائی کا نیا طوفان آسکتا ہے۔ پاکستان کی کرنسی پر بے پناہ دبائو پڑسکتا ہے۔ داخلی طور پر مخالفتوں کا نیا طوفان اٹھ سکتا ہے۔ ریاست کے طاقتور ستونوں کی طرف سے بھی مشکلات سامنے آسکتی ہیں۔ پراپیگنڈا اور کردارکشی کی خوفناک مہمات کا سامنا کرنا پڑ سکتا ہے۔ قوم کو بھوک اور پیاس کے دشت و صحرا سے گزرنا پڑ سکتا ہے۔ پاکستان کے ازلی دشمن ایسے موقع پر سوئے استفادہ کرسکتے ہیں اور بھی کئی اَن دیکھے مسائل پیش آسکتے ہیں۔ ان سب پہلوئوں پر آج ہی غور و فکر کر لینا چاہیے۔

لا الہ الا اللہ کہنے والوں کو یہ معلوم ہونا چاہیے کہ حقیقی آزادی کے راستے میں یہ مرحلہ بھی آتا ہے کہ سپاہی اپنے پیٹ پر ایک ایک پتھر باندھتے ہیں اور قائد و رہبر دو پتھر بابندھتا ہے۔ پھر کہیں جا کر حقیقی آزادی کے خواب کی تعبیر دکھائی دیتی ہے، کیا ہم اس کے لیے تیار ہیں؟ قرآن حکیم ایک سے زیادہ مقامات پر یہ کہتا ہے کہ کیا تم یہ سمجھتے ہو کہ تم کہو گے کہ ہم ایمان لائے ہیں اور تمھیں آزمایا نہیں جائے گا۔؟ اَحَسِبَ النَّاسُ اَنْ یُّتْرَكُوْۤا اَنْ یَّقُوْلُوْۤا اٰمَنَّا وَ هُمْ لَا یُفْتَنُوْنَ (عنکبوت۲) “کیا لوگوں نے یہ سمجھ رکھا ہے کہ انھیں اسی پر چھوڑ دیا جائے گا کہ وہ کہتے ہیں کہ ہم ایمان لائے ہیں اور انھیں آزمایا نہیں جائے گا؟” ان دنوں ہمسایہ ملک ایران کی مثال بہت دی جا رہی ہے کہ پچاس کی دہائی میں ڈاکٹر مصدق کی حکومت کا تختہ امریکہ نے کیسے پلٹا۔ ہمارے تجزیہ کار یہ کہہ رہے ہیں کہ وہی تمام حربے پاکستان میں حکومت کو پلٹنے کے لیے استعمال کیے گئے ہیں۔ البتہ ایران میں 1979ء میں جو انقلاب رونما ہوا اور ابھی تک باقی اور مستحکم ہے، اس کی اونچ نیچ کا جائزہ لینا بھی ضروری ہے۔

وہ مستحکم تو ہے لیکن ایران کے عوام اب بھی اس حقیقی آزادی کی بھاری قیمت ادا کر رہے ہیں اور ہر روز نو بہ نو مشکلات کا سامنا کر رہے ہیں، قربانیاں دے رہے ہیں اور اپنی قیادت کے ساتھ کھڑے ہیں۔ داخلی فتنہ سامانیاں بھی جاری رہتی ہیں اور خارجی مداخلتیں اور سازشیں بھی۔ یہ بھی بجا ہے کہ اس کے باوجود ایران نے زندگی کے بہت سے شعبوں میں حیران کن پیش رفت کی ہے اور یہ بھی درست ہے کہ خارجی طور پر بھی اپنے آپ کو مستحکم کیا ہے، اپنے انقلاب کا پیغام سرحدوں کے اس پار بڑی کامیابی سے پہنچایا ہے اور قوموں کے اندر یہ پیغام ایک تبدیلی کا باعث بن رہا ہے۔ استعمار کے خلاف مزاحمت زیادہ منظم اور وسیع تر ہوچکی ہے۔ استعمار کے لے پالک حکمران اس سے خوفزدہ ہیں، استعمار اسی خوف کو انقلاب کی پیش رفت کے راستے میں استعمال کرتا ہے۔ بہرحال معرکہ جاری ہے۔