تہران: ایران کے شہر مشہد میں واقع حضرت امام رضا کے مزار میں مسلح شخص نے حملہ کیا ہے جس کے نتیجے میں ایک عالم دین جاں بحق اور دو زخمی ہو گئے ہیں۔ حملہ آور کو جائے وقوع سے گرفتار کر لیا گیا ہے۔

برطانوی خبر رساں ایجنسی روئٹرز کے مطابق مسلح شخص نے چاقو اٹھا رکھا تھا جس سے وہ حملہ آور ہوا۔

ایران کی تسنیم نیوز ایجنسی کے مطابق زخمیوں کو فوری طور پر طبی امداد کے لیے اسپتال منتقل کردیا گیا ہے جب کہ حملہ آور کو جائے وقوع سے گرفتار کر لیا گیا ہے۔

میڈیا رپورٹس کے مطابق پولیس کی جانب سے حملہ آورکے متعلق تفصیلات جاری نہیں کی گئی ہیں البتہ ایران کے سرکاری ٹی وی کے مطابق حملے میں جاں بحق ہونے والے عالم دین کا نام محمد اصلانی ہے۔ زخمیوں کی بابت کوئی اطلاع فراہم نہیں کی گئی ہے۔