سیاست نا ممکنات میں سے امکان تلاش کرنے کا نام ہے لیکن ہماری سیاست نے پورے سماج کو بند گلی میں لا کھڑا کر دیا ہے ۔ انتخابات اور ہیجان تو جڑواں ہیں۔انتخابی ماحول میں پولرائزیشن کا جنم لینا ایک فطری سی بات ہے۔ لیکن انتقال اقتدار کے بعدپولرائزیشن کی جگہ حکمت کو لے لینی چاہیے۔انتخابات کے دوران سبھی حریف ہوتے ہیں لیکن حکومت سنبھالنے کے بعد اہل اقتدار کا منصب حریف کا نہیں ، گھر کے بڑے کا ہوتا ہے۔ایک سیاسی جماعت اپنی گروہی عصبیت کی اسیر ہو سکتی ہے لیکن وہی سیاسی جماعت جب اقتدار میں آ جائے توا س کی عصبیت کا مرکز کوئی ایک جماعت نہیں ، پوری قوم ہونی چاہیے۔ چنانچہ منصب کا تقاضا تھا حکومت آگے بڑھتی اور حزب اختلاف کو ساتھ لے کر چلنے کی کوئی صورت نکالتی۔لیکن حکومت اس تکلف کی روادار نہیں۔

حزب اختلاف نے بعض اہم مواقع پر قانون سازی کے عمل میں بن بلائے جا کر تعاون فراہم کیا اور قائد حزب اختلاف کو وفاقی وزیر برائے حزب اختلاف کا طعنہ دیا جانے لگا لیکن حکومت نے ایک قدم آگے بڑھا کر نہیں دیا۔نتیجہ یہ ہے کہ تلخی اور تندی بڑھتی جا رہی ہے۔ اب پوری قوم باہم صف آراء ہے۔ ہر طبقہ فریق بن کر رہ گیا ہے۔ سیاست کے ز یر اثر سماج افراط و تفریط کا شکار ہوتا ہے تو اہل دانش اپنے فکری توازن سے اسے تھام لیتے ہیں لیکن یہاں اہل فکر و دانش بھی صف آراء ہیں۔ مستثنیات یقینا ً موجود ہیں لیکن معاشرے میں اہل قلم کا عمومی حوالہ بھی اب یہ ہے کون کس کے حصے کا دانش ور ہے۔ اہل قلم کی تحریریں،بالعموم،اب اس لیے نہیں پڑھی جاتیں کہ ان سے رہنمائی حاصل کی جائے بلکہ ان کی افادیت اب صرف اتنی ہے کہ فریقین میں کس کے حق میں کس نے کتنے دلائل پیش کیے ہیں۔پذیرائی اور اختلاف کا تعین اب دیانت سے نہیں ، عصبیت سے ہوتا ہے۔ ریاستی ادارے اس افراط و تفریط کو سنبھال سکتے ہیں لیکن سچ یا جھوٹ سے قطع نظر،دھول ایسی اڑی ہے کہ ریاستی ادارے بھی اس کی ز د میں ہیں اور انہیں بھی فریق تصور کیا جا رہا ہے۔سول سوسائٹی سے متوازن رائے کی امید رکھی جاتی ہے کیوںکہ وہ کشمکش اقتدار میں حریف نہیں ہوتی لیکن اس کا توازن بھی لڑ کھڑا رہا ہے ۔

عاصمہ جہانگیر کی یاد میں منعقدہ تقریب میں کی گئی تقاریر اس پر شاہد ہیں۔کچھ دوست ممالک بروئے کار آ جاتے تھے لیکن ایک تو یہ ویسے ہی کوئی مستحسن عمل نہیں کہ داخلی سیاست میں کوئی بیرونی قوت دخیل ہو اور پھر داخلی سیاست کے آزار نے دوست ممالک کے دامن کو بھی نہیں بخشا ۔اب اس بات کا امکان بہت کم ہے کہ ان میں سے کوئی بروئے کار آ سکے ۔ اہل سیاست کو اس بات کا احساس نہیں کہ ان کا اخلاقی وجود اب برف کا باٹ ہے اور دھوپ میں رکھا ہے۔ مسائل کا کوہِ گراں ہے۔معیشت لڑکھڑا رہی ہے۔تعلیم و صحت سے لے کر قانون و انصاف تک،ہر شعبہ غیر معمولی اصلاحات کا طالب ہے لیکن پارلیمان کے پاس ملک کے سنجیدہ مسائل پر بات کرنے کے لیے وقت ہی نہیں۔پارلیمان کے ایک دن کے اجلاس پر اوسطا چار کروڑ خرچ آتا ہے لیکن غیر سنجیدگی کا یہ عالم ہے کہ کتنے ہی اجلاس محض اس لیے ملتوی ہو جاتے ہیں کہ کورم پورا نہیں ہو سکا ۔ اور کورم بھی اس وقت ٹوٹتا ہے جب اراکین کی حاضری ایک چوتھائی سے بھی کم ہو۔ قوم کی تعمیر پارلیمان کا بنیادی موضوع ہونا چاہیے تھا اور نصاب تعلیم سے لے کر روزگار کے امکانات تک ، ایک ایک مورچے پر پارلیمان کو بروئے کار آنا چاہیے تھا لیکن اس کا عمومی رویہ ان مسائل سے لاتعلقی کا ہے۔ یوں لگتا ہے جیسے کچھ آسودہ حال لوگ وقت گارنے کے لیے جمع ہوتے ہیں ، تفریح طبع کے طور پر کچھ خطابات فرماتے ہیں اور گھر کو لوٹ جاتے ہیں۔ معیشت کیسے بہتر ہو گی۔ قرض کا بوجھ کیسے اترے گا۔

اس وقت ہمارے بجٹ میں قرض کی اقساط اور سود وغیرہ کی ادائیگی کے لیے مختص رقم کا حجم دفاعی بجٹ سے بھی زیادہ ہو چکا ہے۔ یہ سلسلہ کہاں رکے گا؟ کشمیر پر قومی پالیسی کیا ہونی چاہیے؟ افغانستان میں امکانات کیا ہیں اور خدشات کی نوعیت کیا ہے؟ بند گلی میں صرف دشنام کی سنگ زنی ہے اور الزامات کی دھول اڑ رہی ہیں۔جمہوریت کا غلغلہ ہے لیکن کون سی سیاسی جماعت ہے جس کی اپنی صفوں میں جمہوریت ہو؟ ہر طرف یہی عالم ہے کہ پارٹی کے مناصب کے لیے الیکشن نہیں، نامزدگیاں ہوتی ہیں۔قیادت یہاں میراث میں آتی ہے اور پارلیمان کے دروازے عام آدمی پر عملاً بند ہیں۔ عام آدمی کو انتخابات کے نام پر صرف اس بات کی آزادی ہے کہ چند حکمران خاندانوںمیں سے کسی ایک کا انتخاب کر لے۔آمریت ہو یا جمہوریت ، یہی خاندان اقتدار میں ہوتے ہیں۔