ہائی گیٹ قبرستان کا سب سے مقبول باسی- ناصر منصور

ہائی گیٹ لندن کے قبرستان میں ایک لاکھ ستر ہزار سے زائد معلوم اور نامعلوم افراد مدفون ہیں لیکن اس قبرستان کا ایک مکیں ایسا بھی ہے جس کی قبر پر ہمیشہ تازہ پھول رکھے ملتے ہیں۔ کارل مارکس جسے پیار سے مور بھی کہا جاتا تھا ہی وہ ہائی گیٹ کا سب سے مقبول مکیں ہے جس کی یادگار کے سامنے ہر روز سینکڑوں اور بعض موقعوں پر تو ہزاروں چاہنے والے گل ہائے عقیدت پیش کرنے حاضر ہوتے ہیں۔

علم و عمل کی دنیا کی اس عظیم ہستی کو خراج تحسین پیش کرنے والوں میں براعظم یوروپ، شمالی و جنوبی امریکہ، افریقہ اور ایشیا پیسفک سے تعلق رکھنے والے انقلابی شامل ہوتے ہیں۔ ایک اندازہ کے مطابق ہر سال ایک لاکھ افراد اس قبرستان میں آسودہ خاک یکتا انقلابی فلسفی کی یادگار کو وزٹ کرتے ہیں۔
انسانی تاریخ کے کئی ایک نامور کرداروں اس اساتیری حیثیت کے حامل ذہن سے اظہار محبت کے لئے اس کی آخری آرام گاہ پر وفا کا قرض چکانے آئے۔ ایک مہا انقلابی کو ایک اور عظیم انقلابی بھی انقلابی سلام کرنے پہنچا وہ لینن تھا جو 1903 میں لندن میں منعقدہ روسی سوشل ڈیموکریٹک لیبر پارٹی کی کانگریس کے اختتام پر دیگر روسی انقلابیوں کے ہم راہ مارکس کی قبر پر جمع ہونے والوں میں شامل تھا۔

مارکس کی یادگار پر عمومی طور پر پیرس کمیون کے دن ،یکم مئی اور مارکس کے یوم پیدائش پر ہزاروں انقلابی آتے ہیں اور انسانی تاریخ کے عظیم فلسفی اور انقلابی کو یاد کرتے ہیں۔ عرصہ ہوا ہائی گیٹ قبرستان میں داخلہ کے لئے ساڑھے چار پاؤنڈ فی فرد فیس عائد کر دی گئی ہے۔ اور ایک اندازہ کے مطابق تقریبا پانچ لاکھ پاؤنڈ سالانہ داخلہ فیس کی مد میں جمع ہوتے ہیں۔ سرمایہ داری نے مارکس کی قبر سے بھی کمائی کا ذریعہ ڈھونڈ نکالا۔

FaceLore Pakistan Social Media Site
پاکستان کی بہترین سوشل میڈیا سائٹ: فیس لور www.facelore.com

مارکس کی ساتھی جینی وان ویسٹ فیلن کا انتقال 1881 میں اور مارکس کا انتقال 1883 میں ہوا۔ دونوں کی تدفین جس مقام پر ہوئی وہیں مارکس کا نواسہ ہیری لانگیوٹ اور ملازمہ ہیلینا ڈیمورتھ بھی مدفون ہیں۔ خاندان کی جانب سے ایک مشترکہ کتبہ نسب کیا ہے جس پر مدفون کے نام کندہ ہیں ۔ مارکس کی وفات کے کچھ ہی عرصہ بعد جرمن سوشل ڈیموکریٹک پارٹی کی کانگریس میں مارکس کے شایان شان خصوصی یادگار تعمیر کرنے کی تجویز پیش کی گئی ، اسی سلسلے میں مارکس کے دوست اورجرمن ایس ڈی پی کے رہنما آگاسٹ بائبل نے ایک خط اینگلز کو یادگار کی تعمیر سے متعلق تحریر کیا ، اینگلز نے جوابا لکھا کہ مارکس کی قبر پر لگا کتبہ مور کے خان دان کو عزیز تھا اس لئے طے ہوا کہ جب مارکس کو نئے نمایاں مقام پر منتقل کیا جائے گا تو اسی خاندانی کتبہ کو بھی نسب کیا جائے گا۔

قبرستان کے جس حصہ میں مارکس کا اصل مقام مدفون تھا وہ نمایاں مقام نہیں تھا اس پر ایسا وقت بھی آیا کہ دھائیوں یہ جگہ عدم توجہ کا شکار رہنے کی بنا پر اگنے والی جھاڑیوں نے قبر کو آنے والوں کی نظر سے مکمل طور پر اوجھل کر دیا تھا۔ لیکن 1923 میں برطانوی کمیونسٹ پارٹی اور ورکرز (کمیونسٹ) پارٹی آف یو ایس اے کی کوششوں سے قبر کی جانب توجہ مبذول ہوئی اور 1954 میں مارکس اور ان کے ساتھ دیگر مدفون افراد کو نئے اور نمایاں مقام پر دوبارہ منتقل کیا گیا اور 1956 میں یادگار کی تعمیر مکمل ہوئی.

اس یادگار کو لارنس بریڈشا نے ڈیزائن کیا تھا اور اس کی نقاب کشائی 1956 میں کمیونسٹ پارٹی آف گریٹ برطانیہ کے جنرل سکریٹری کامریڈ ہیری پولیٹ کی قیادت میں ایک تقریب میں کی گئی تھی، پارٹی نے یادگار کی تعمیر کے لئے فنڈز فراہم کیے تھے۔ یادگار سنگ مرمر کے پیڈسٹل پر رکھے کانسی کے بنے مارکس کے ایک بڑے مجسمے پر مشتمل ہے۔ جہاں خاندانی کتبہ کے ساتھ ہی شہرہ آفاق تخلیق کمیونسٹ مینی فیسٹو کے آخری جملہ ” ورکرز آف آل لینڈز یونائیٹ ” کے علاوہ مارکس کے “تھیسس آن فیورباخ ” میں تحریر قول ” فلسفیوں نے مختلف طریقوں سے دنیا کی تشریح کی ہے اصل کام اسے بدلنا ہے” بھی کندہ ہے۔

مارکس کی یادگار کے اردگرد دنیا کئے ایک انقلابی بھی مدفون ہیں۔ جن میں جنوبی افریقہ کی کمیونسٹ پارٹی کے چیرمین ڈاکٹر محمد یوسف ڈوڈو ، عراقی کمیونسٹ پارٹی کے سعد سعدی علی ، کردش انقلابی نزہد احمد عزیز آغا ، کرس ہارمن جیسے آدرش وادی شامل ہیں۔ ایک حیرت انگیز بات یہ بھی ہے کہ مارکس کا قریب ترین مدفون پڑوسی ایک پاکستانی کرامت حسین (ستارہ قائداعظم ) ہے ، یہ کون ہے اس بارے کچھ معلومات میسر نہیں۔

جہاں مارکس اور اس کے نظریات سے محبت کا اظہار 19 ویں صدی کے اختتام سے لے کر پوری 20 ویں صدی تک اور اب 21 ویں صدی میں بھی تسلسل سے جاری ہے ، اس کی یادگار پر ہر رکھے تازہ پھول اس کا ثبوت ہے وہیں مارکس اور مارکس کے نظریات سے نفرت کرنے والے دائیں بازو کے انتہا پسند اور فاشسٹ گروہ مارکس کی یاد گار کو مسلسل حملوں کی زد میں رکھے ہوئے ہیں۔ کیا عجب اتفاق ہے کہ مارکس اور مارکس کے نظریات سے نفرت کے ضمن میں نسل پرست ، فاشسٹ، دائیں بازو کے انتہا پسند ، مذہبی انتہا پسند ، سرمایہ پرست قوتیں اور لبرلز ایک ہی صف میں کھڑے نظر آتے ہیں۔

مارکس کی یادگار پر پہلا حملہ 1960 میں پائپ بم کے ذریعے کیا گیا پھر 1970 میں یادگار کو دھماکہ سے اڑانے کی کوشش کی گئی جس کے نتیجے میں مجسمہ اور یادگار کو ناقابل تلافی نقصان پہنچا۔ یادگار پر “ساوستکا” ( ہٹلر کا نشان) پینٹ کیا گیا ، اس کے بعد نیا مجسمہ نصب کیا گیا۔ 2019 کے ماہ فروری میں دو مرتبہ یادگار کو دائیں بازو کے انتہا پسندوں نے نقصان پہنچایا۔ کتبہ پر کندہ عبارت کو ہتھوڑا سے توڑا گیا، یادگار پر ایک بار پھر نفرت انگیز نعرے تحریر کئے گئے۔

مجھے پچھلے دنوں لندن میں دن قیام کے دوران مارکس کی یادگار پر جانے کا موقعہ ملا ۔ میرے ہم راہ فیصل ایدھی بھی تھے۔ جب یادگار پر پہنچے تو دیکھا کہ تازہ پھولوں کا ایک بڑا گل دستہ ویتنام کے ایک ادارے کے کارکنوں کی جانب سے رکھا گیا تھا۔ ہم کافی دیر وہاں موجود رہے، کئی ایک کمیونسٹ رہنماؤں کی قبروں پر بھی گئے ۔ اسی دوران ایک نوجوان کیوبن جوڑا اپنے دو بچوں کے ہمراہ پھول لئے پہنچا تھا اور دیر تک سر جھکائے احتراما خاموش کھڑے نظر آئے۔ میں نے وہاں مختلف بودوباش اور نسلوں کے درجنوں وفود کو یادگار پر آتے اور محبوب انقلابی فلسفی کو خراج تحسین پیش کرتے دیکھا۔

Advertisements
julia rana solicitors london

مارکس اور مارکس کا نظری ورثہ آج بھی سرمایہ کے جبر کے خلاف انسانیت کے لئے مشعل راہ ہے۔

  • FaceLore Pakistan Social Media Site
    پاکستان کی بہترین سوشل میڈیا سائٹ: فیس لور www.facelore.com
  • julia rana solicitors
  • julia rana solicitors london
  • merkit.pk

ناصر منصور
محنت کی نجات کے کوشاں ناصر منصور طالبعلمی کے زمانے سے بائیں بازو کی تحریک میں متحرک ایک آدرش وادی ہیں

بذریعہ فیس بک تبصرہ تحریر کریں

Leave a Reply