نئی دہلی: بھارت میں غیر ملکی سفارتکار بھی محفوظ نہیں ہیں، برطانوی سفارتکار کو چندی گڑھ میں جنسی ہراسگی کا سامنا کرنا پڑا۔

بھارتی میڈیا کے مطابق برطانوی سفارتکار نے جنسی ہراسگی کے خلاف کیس رجسٹر کروایا ہے، جس میں بتایا گیا ہے کہ موٹر سائیکل سوار نے پیچھے آکر ان کی پشت پر ہاتھ مارا اور بھاگ گیا۔

60 سالہ برطانوی سفارتکار صبح اپنی رہائش گاہ سے ٹینس کھلینے نکلی تھیں، جب ان کے ساتھ یہ واقع پیش آیا۔

ہراسگی کی رپورٹ کرانے کے بعد پولیس کی جانب سے متاثرہ افراد کا نام صیغہ راز رکھا جاتا ہے، لیکن برطانوی سفارتکار کی رپوٹ کے بعد بھارتی پولیس نے  ان کی ذاتی معلومات اپنی ویب سائٹ پر اپ لوڈ کر دیں، جس میں ان کا نام اور نمبر بھی شامل ہے۔

اس غیر ذمہ دارانہ رویہ پر جب پولیس حکام سے پوچھا گیا تو انہوں نے لا علمی کا اظہار کرتے ہوئے کہا کہ ایسا نہیں ہونا چاہیے تھا وہ اس بارے میں معلوم کریں گے۔

Advertisements

دو روز گزر جانے کے بعد بھی پولیس ابھی تک ملزمان کا پتہ لگانے میں ناکام ہے، نشاندہی کرنے کے لیے سی سی ٹی وی فوٹیج کا بھی سہارا لیا جا رہا ہے لیکن پولیس کسی سراغ تک نہ پہنچ سکی۔