راقم الحروف نے ۱۹۶۰ کے لگ بھگ پچاس نظموں میں نثری جملے کی ساخت کو برقرار رکھتے ہوئے، (سبھی متعلقات ِ فعل کو ان کی صحیح جگہ پر برقرار رکھتے ہوئے )رن۔آن۔لائنز کے اسی فارمولے کو آزمایا جس پر چل کر شیکسپیئر اور مارلو ؔنے اپنے کرداروں کے مکالمات لکھے تھے۔ یہاں تک کہ انگریزی عروض یعنی “ایمبِک پیرا میٹر” میں مستعدی سے پاؤں جمائے ہوئے سطور کی قطع و برید اس طرح کی تھی کہ نفس ِ مضمون گذشتہ سطر سے تجاوز کرتا ہوا ، ما بعد سطر کے وسط یا آخر تک ، اور بعض اوقات ما بعد سطر سے بھی منسلک اگلی سطر تک ایک جھرنے کی طرح سے بہتا چلا جائے۔ (کتھا چار جنموں کی )
(اقتباس القط)

اس تجربے کے معرض وجود میں آنے کے کوئی بیس برس بعد جب ۱۹۸۰ میں ایک پراجیکٹ کے تحت میری تحریر کردہ ایک سو نظموں کا مجموعہ ـ’’دست ِ برگـ ‘‘کے عنوان سے چھپا تو اس پر ایک ذاتی خط میں ڈاکٹر کالیداس گپتا رضاؔ نے مجھے لکھا۔۔ ’’مجھے یقین ہے کہ فارسی عروض کی قربانی دیے بغیر اردو میں بلینک ورس کے لیے رن۔آن۔لائنز کی یہ سہولیت وقت کی ایک بہت بڑی ضرورت تھی جسے آپ نےپورا کیا ہے۔ آنے والا مورخ جب اس کا لیکھا جوکھا کرے گا تو اردو کی آزاد نظم پرآپ کے اس احسان کو سراہا جائے گا۔‘‘

ڈاکٹر گوپی چند نارنگ نے بھی کتاب کے ’’ ـاختتامیہ‘‘ میں یہ رائے ظاہر کی کہ اگر اس چلن پر اردو کی آزاد نظم چل سکی تو یہ قدم مستحسن قرار پائے گا۔‘‘

ایک سو نظمیں، جو سب کی سب بحر خفیف میں تھیں ،کسی ایسے استعارے پر استوار تھیں جسے ہر قاری اپنی نسلی ،تہذیبی یا مذہبی یاداشت سے فوری طور پر مربوط کر سکتا ہے۔ ایک نظم دیکھیں، جس میں عید کا چاند اور رام چندر کے چودہ برس کے بنباس کو استعاراتی جامہ پہنایا گیا ہے۔

جانے والے نے عید کا دن ہی
کیوں چنا، اس سے کوئی کیا پوچھے
چاند کی پہلی رات تھی، اور آج
چاند کی چودھویں ہے ، چودہ دن
دن نہیں ہیں، طویل تر عرصہ
چودہ برسوں کا ہے، جسے میں نے
ذہن کے جنگلوں میں پھرتے ہوئے
گھر کی دہلیز پر گذارا ہے۔
۔۔۔۔۔۔۔۔۔۔۔۔۔۔۔۔۔۔۔

کچھ نمونہ جات اور ملاحظہ فرمائیں۔

وہ جو ہر روز اپنی کھڑکی سے
جھانکتا ہے کہ دور سے کوئی
راہ رو آئے، اور وہ اس کو
گھر میں مدعو کرے، محبت سے
بیٹھ کر گفتگو کے، اس کو
اس حقیقت کا کوئی علم نہیں
شہر کی موت ہو چکی۔۔۔اور وہ
(اپنی کھڑکی سے جھانکنے والا)
اک اکیلا ہے ساری دنیا میں
نسل کا آخری نمائندہ !
۔۔۔۔۔۔۔۔۔۔۔۔۔۔۔۔۔۔۔

شرط تھی واپسی کی، دونوں مُڑے
آئے، چوکھٹ کے پاس آ کے رکے
گھر وہی تھا، کواڑ پہلے سے
کچھ زیادہ پرانے لگتے تھے
دونوں داخل ہوئے تو پاوءں میں
کانچ سا چُبھ گیا، جھُکے، دیکھا
سات برسوں کی جس رفاقت کو
بھول بیٹھے تھے، اس کے ٹوٹے ہوئے
عکس کا اک پرانا ریزہ تھا۔
۔۔۔۔۔۔۔۔۔۔۔۔۔۔۔۔۔۔۔۔۔

سانپ سے خوف اب نہیں آتا۔
سانپ کا زہر تو میں جھیل چکا
اب مجھے بین کے سُروں سے بہت
خوف آتا ہے، ان کا کاٹا ہوا
کبھی تریاق سے نہیں بچتا۔

پھر یوں ہوا کہ جیسےدبے پاوٗں ہی، میری اس ’نو نیازآمدہ ‘جدت کا ذکر کیے بغیر، یہ چلن لگ بھگ سب آزاد نظم لکھنے والوں نے اختیار کر لیا اور کچھ برسوں میں ہی یہ طریق ِ کار ایسے مقبول ہوا جیسے صدیوں سے ہوتا چلا آ رہا ہو۔