کام اس سے آ پڑا ہے کہ جس کا جہان میں
لیوے نہ کوئی نام ستم گر کہے بغیر
غالب نے اپنی مشہور غزل میں یہ شعر نہ تو چارلی ایبڈو کے ایڈیٹر کے لیے کہا تھا، نہ ہی فرانسیسی صدر، سفیر یا گستاخ کارٹونسٹ کے لیے کہا تھا، اس شعر کا ہدف پاکستان کا حکمران طبقہ یعنی اہل ِ حل و عقد بھی نہ تھے، یہ شعر معمول کا ایک غزلیہ شعر ہے،مگر مجھے اس شعر کا اطلاق آسٹریا، ہالینڈ اور فرانس سے لے کر پاکستان کے حکمران طبقے تک، سب پر یکساں ہوتا نظر آ رہا ہے۔صرف حکمران و اہلِ حل و عقد نہیں بلکہ مذہبی طبقات بھی اسی شعر کی تشریح کا جزوِ لازم ہیں۔
یہ بات بڑی واضح اور دوٹوک ہے کہ حضرت محمد مصطفیٰ ﷺ کی ذاتِ والا صفات کا تمسخر اڑانے یا سرکارِ دو عالمﷺ کی نعوذ باللہ توہین کرنے والا مرتد اور لعنتی ہے اور اس کے لیے سزا متعین ہے۔مگر دنیا کے ہر کونے میں نہ تو اسلامی حدودو لاگو ہوتی ہیں نہ ہی پاکستان کا قانون لاگو ہوتا ہے ،پاکستان کا قانون تو قبائلی علاقہ جات میں بھی اپنی حیثیت کھو دیتا ہے۔ وہ جسے علاقہ غیر کہا جاتا ہے جہاں ریاستی رٹ جرگوں ، مَلکوں اور خانوں کے ذریعے بلکہ انھیں تاوان ادا کر کے قائم کی جاتی ہے۔ پھر بھلا، ہالینڈ،آسٹریا یا فرانس اورڈنمارک سے پاکستان کیسے اپنے تعلقات یکسرختم کر لے؟اس کے لیے کسی پالیسی اور کسی حکمت عملی کی ضرورت ہے۔یہ بات واضح ہے کہ پاکستان اپنے معاشی و سیاسی قد کاٹھ میں اس قابل ہی نہیں کہ فرانس کے سفیر کو ملک بدر کر دے۔
کیا آپ کو علم ہے کہ فرانس سلامتی کونسل کے مستقل پانچ ارکان میں سے ایک اہم رکن ہے؟حکومت و اپوزیشن کے سب لوگ نبی اکرم ﷺ کی ناموس پر جان نچھاور کرتے ہیں،مگر میری دانست میں جذبایت سے معاملہ سنبھلنے کے بجائے بگڑتا ہے۔تحریک لبیک پاکستان جسے حکومت نے کالعدم قرار دے کر پھر اس سے مذاکرات شروع کیےہیں،ان کے اخلاص اور نیک نیتی پر کسی مسلمان کو شک نہیں۔لیکن یہ امر بھی واضح ہے کہ ان کا طرزِ عمل نبوی تعلیمات ِ کے بالکل مختلف نظر آیا۔مجھ جیسا کم فہم مسلمان بھی یہ جانتا ہے کہ راستے روکنا اسلامی تعلیمات کے منافی ہے۔

میرے لیے یہ بات تکلیف دہ ہے کہ ہم 57 اسلامی ممالک میں درجن بھر بھی ایسے اسکالر پیدا نہیں کر سکے جو یورپ ،امریکہ اور دیگر ملحدین کو اس امر پر قائل کر سکیں کہ آزادی اظہار رائے کے نام پر نبی اکرم ﷺ کی گستاخی سے مسلمانوں کے دل دکھی ہوتے ہیں۔کوئی دو چار اسکالر جو دنیا کو مقام ِ پیغمبر ِ آخر الزمانﷺ کی حقیقت سے آشنا کرا سکیں۔جو اقوام متحدہ، سلامتی کونسل اور دیگر عالمی فورمز پر اسلام کی علمی و عقلی نمائندگی کر سکیں۔ہم سب نے مگر فرقہ پرست پیدا کیے ہیں۔ جو اسلام کے بجائے اپنے اپنے فرقے کی نمائندگی کرتے ہیں۔ حیف صد حیف۔
موجودہ حکومت نے بھی اس حوالے سے انتہائی کج فہمی اور غیر ذمہ داری کا مظاہرہ کیا۔حکومت کو تو معاہدہ کرنا ہی نہیں چاہیے تھا،اگر کر لیا تھا تو پھر اس پر عمل بھی کیا جاتا۔ قرارداد قومی اسمبلی میں پیش کی جاتی۔جو کام اتنے بندے مروا کر ،تماشا بنا کر کیا جا رہا ہے یہی کام پہلے کر لیا جاتا؟ مگر وہی بات جو کالم کے شروع میں شعر کی شکل میں رقم کی ہے۔
اس امر میں کلام نہیں کہ بیشتر لوگ چارلی ایبڈو کے بارے میں دو چار جملے بھی نہ جانتے ہوں گے۔ بی بی سی اردو کے مطابق” ” چارلی ایبڈو ایک ہفتہ وار رسوائے زمانہ فرانسیسی جریدہ ہے جس میں طنزیہ انداز میں حکومت اور اسٹیبلشمنٹ پر تنقید کی جاتی ہے۔ کیتھولک، یہودیت اور اسلام کے بعض پہلوؤں کا تمسخر اڑانے کی وجہ سے یہ میگزین کافی عرصے سے تنازعات کو ہوا دیتا رہا ہے۔”اس میگزین نے 2015 میں بھی پیغمبر ِ اکرمﷺ کی شان میں پہلی بار گستا خانہ خاکوں کی اشاعت کی تھی،جس کے بعد پورے عالم ِ اسلام میں اس گستاخانہ عمل کے خلاف شدید ردعمل کا اظہار کیا گیا تھا،جبکہ دیگر مذاہب کے ماننے والے عدل پسند افراد نے بھی میگزین کے اس عمل کی مذمت کی تھی۔

فرانسیسی جریدے چارلی ایبڈو نے پیغمبر اسلام ﷺکے وہ خاکے ستمبر 2020 میں پھر سے شائع کیےتھے جن کی بنا پر 2015 میں اس پر حملہ ہوا تھا۔چارلی ایبڈو پر یہ حملہ 7 جنوری 2015 کو کیا گیا تھا۔ جنوری 2015 کی سات تاریخ کو دو بھائیوں سعد اور شریف کواچی یا کوچی نے چارلی ایبڈو کے دفتر میں گھس کر فائرنگ کر دی تھی جس میں اس اخبار کے ایڈیٹر سٹیفن شربونیئر، چار کارٹونسٹ، دو کالم نگار، ایک کاپی ایڈیٹر اور ایک مہمان جو اس وقت وہاں موجود تھا، ہلاک ہو گئے تھے۔ اس ایڈیٹر کا محافظ اور ایک پولیس والا بھی فائرنگ کے دوران مارےگئے تھے۔پولیس نے جب حملہ آوروں کی تلاش شروع کی جو کہ آخر کار مارے گئے، تو پیرس شہر کے مشرقی حصے میں ایک اور واقعہ پیش آیا۔ ایمدی کولابلی جسے احمدی بھی لکھا جاتا جو کواچی برادران کا ایک ساتھی تھا، نے ایک پولیس خاتون اہلکار کو ہلاک کر کے کئی لوگوں کو یرغمال بنا لیا تھا۔ اس نے 9 جنوری 2015کو یہودیوں کی ایک سپر مارکیٹ میں چار یہودیوں کو قتل کر دیا اور خود پولیس سے فائرنگ کے تبادلے میں ہلاک ہو گیاتھا۔ایک ویڈیو ریکارڈنگ میں احمدی نے کہا تھا کہ اس نے یہ حملہ دولت اسلامیہ کے نام پر کیا ہے۔

اس واقعہ کے دو چار روز بعد فرانس میں دہشت گردی کے متعدد واقعات ہوئے تھے جس کے باعث مسلم کمیونٹی پر عرصہ حیات تنگ ہوا تھا۔2018 میں جب ایک آسٹریائی خاتون نے پیغمبرِ اسلامﷺ کی شان میں گستاخی کی تھی تو یورپی یونین کی عدالت برائے انسانی حقوق (ای ایچ سی آر) نے کہا تھا کہ پیغمبرِ اسلام کی توہین ‘آزادیِ اظہار کی جائز حدوں سے تجاوز کرتی ہے،، اور ‘اس کی وجہ سے تعصب کو ہوا مل سکتی ہے اور اس سے مذہبی امن خطرے میں پڑ سکتا ہے”بعد میں یہ سزا برقرار رکھی گئی تھی۔
اب جبکہ حکومت اور کالعدم تحریک لبیک پاکستان کے درمیان گھمسان کے رن کے بعد مذاکرات کا تیسرا دور کامیاب ہوا تو حکومت فرانسیسی سفیر کو ملک بدر کرنے کے حوالے سے ایک قرارداد قومی اسمبلی میں لائی ہے جسے اپوزیشن نے سخت تنقید کا نشانہ بنایا جبکہ پیپلز پارٹی نے اجلاس میں شرکت ہی نہیں کی۔ کالعدم تحریک لبیک نے حکومت کے سامنے چار شرائط رکھی تھیں،کہ فرانسیسی صدر ایمانوئیل میکرون کی جانب سے گستاخانہ خاکوں کی حمایت کے بعد فرانسیسی سفیر کو ملک بدر کیا جائے۔ پارٹی کے امیر سعد رضوی کو رہا کیا جائے، پارٹی پر پابندی ختم کی جائے اور گرفتار کارکنوں کو رہا کرنے کے ساتھ ساتھ ان کے خلاف درج ایف آئی آرز بھی ختم کی جائیں بشمول فورتھ شیڈول کے۔

قومی اسمبلی کا اجلاس اسپیکر اسمبلی اسد قیصر کی سربراہی میں ہوا، جس میں قرار داد کا متن پڑھ کر سناتے ہوئے رکن پی ٹی آئی امجد علی خان کا کہنا تھا “کہ فرانسیسی صدر نے آزادی اظہار رائے کا سہارا لے کر ایسے افراد کی حوصلہ افزائی کی، جو انتہائی افسوسناک عمل ہے۔انہوں نے کہا کہ یہ ایوان مطالبہ کرتا ہے کہ فرانسیسی سفیر کو ملک سے نکالنے پر بحث کی جائے، تمام یورپی ممالک کو اس معاملے کی سنگینی سے آگاہ کیا جائے، تمام مسلمان ممالک کو شامل کرتے ہوئے اس مسئلے کو بین الاقوامی فورمز پر اٹھایا جائے۔ان کا مزیدکہنا تھا کہ ‘ایوان مطالبہ کرتا ہے کہ بین الاقوامی معاملات کے حوالے سے فیصلہ ریاست کو کرنا چاہیے کوئی گروہ اس حوالے سے دباؤ نہیں ڈال سکتا۔انہوں نے اس معاملے پر ایک اسپیشل کمیٹی کا بھی مطالبہ کیا اور کہا کہ یہ انتہائی حساس معاملہ ہے اور اس کے لیے میری خصوصی درخواست ہے۔”
اس قراد داد کا متن معاہدے کی رو ح کے بالکل بر عکس ہے۔ معاہدہ تو یہ ہوا تھا کہ فرانسیسی سفیر کو ملک بدر کیا جائے، حکومت نے کہا تھا کہ اس حوالے سے قرارداد اسمبلی میں لائی جائے گی جو بالآخر حکومت رسوائی اٹھا کر لے آئی۔ لیکن متن مبہم ہے، کہیں بھی فرانسیسی سفیر کو نکالنے کا ذکر نہیں بلکہ اس پر بحث اور کمیٹی کا ذکر ہے۔ اب کمیٹیاں بنیں گی اور معاملات لٹکتے چلے جائیں گے۔ البتہ قرارداد میں اس بات کا واشگاف اعلان ہے کہ بین الاقوامی تعلقات کا فیصلہ ریاست کی ذمہ داری ہے نہ کہ کسی گروہ کی۔سو جاتے بھی کھائے اور سو پیاز بھی۔ نتیجہ پھر بھی غیر مطلوب ہے۔وجہ؟ پاکستان کی عالمی برادری میں حیثیت ۔ ابھی گزشتہ دنوں ہی برطانیہ نے پاکستان کو 21 انتہائی خطرناک ممالک میں شامل کیا ہے، یعنی ہم صومالیہ، افغانستان، شام، یمن عراق کے ہم رکاب ہیں عالمی برادری کی نظر میں۔فٹیف کا الگ سے خنجر لہراتا رہتا ہے۔