جب بھی آنکھیں کھولتا ہوں
جانی پہچانی یہی دنیا نظر آتی ہے مجھ کو
جب بھی آنکھیں بند کر کے اپنے اندر جھانکتا ہوں
اور ہی دنیا کا نقشہ دیکھتا ہوں

کچھ عجب منظر ہے اندر
گندگی اک عمر بھر کی ۔ لاکھ صدیوں کی غلاظت
جانتا ہوں آدمی کی نسل کا ماضی یہی تھا
اجتماعی لاشعوری ذہن کی ڈِسکٹ کے اندر ایک َچپ سا٭
جس کے کمپیوٹر میں چلنے پر میں اپنی
بند آنکھوں سے برابر دیکھتا ہوں
لڑتے بھڑتے جنگلی وحشی قبیلے

ارتقا کی دوسری منزل پہ تہذیب و تمدّن کا اُبھرنا
نیست و نابود ہونا
مذہبوں کے نام پر لشکر کشی، خلقت کا قتل ِ عام، شہروں کی تباہی
حملہ آور فوجیوں کی بربریت
آمروں کی، بادشاہوں کی ہوَس ِ ملک گیری
نوجوانوں، عورتوں، بچوں کو جیسے ریوڑوں سا ہانک کر
نیلام گھر میں ان کی بولی

تیز رو میں آگے بڑھتے
چِپ کے ان سارے مناظر پر لہو بکھرا ہوا ہے٭

آدمی کی نسل کا ماضی بہت مکروہ ہے
۔۔۔ اب آنکھیں کھولوں؟
چِپ کو ڈسکٹ
میں مقفّل چھوڑ دوں ۔۔۔؟

یہ سوچ کر جب اپنی آنکھیں کھولتا ہوں
چونک کر کیا دیکھتا ہوں
چِپ تو چلتی جا رہی ہے، آج کی دنیا کی تصویریں دکھاتی
سب طرف وحشت وہی ہے
بربریت، جارحیت کا وہی نقشہ ہے ہر سو
کچھ بھی تو بدلا نہیں ہے