میری عمر کے لوگ گواہی دیں گے کہ جب ہم بچے تھے تو ہمارے روز و شب کیسے تھے۔ پہلی بات تو یہ کہ ہم سورج غروب ہونے کے بعد باہر نہیں کھیل سکتے تھے۔ مغرب کے وقت ہر حال میں گھر کی چار دیواری میں موجودگی لازمی تھی۔اس بارے میں کوئی بہانہ یا سفارش باپ کے ڈنڈے یا ماں کی چپل کے سامنے کارگر نہیں تھی۔یہ بھی ممکن نہیں تھا کہ کوئی بچہ رات دس بجے کے بعد بستر سے باہر ہو بھلے نیند آئے نہ آئے۔اسکول ہوم ورک بھی رات کے کھانے کے بعد سونے سے پہلے مکمل کرنا ہوتا تھا۔صرف اس رات دیر تک جاگنے کی اجازت تھی جب اگلے دن یا تو ہفتہ وار یا تہوار کی چھٹی ہو۔مگر جاگنے کا یہ مطلب نہیں تھا کہ بچہ مسلسل ٹی وی کے سامنے بیٹھا رہے۔ ہمیں صرف بچوں کے ٹی وی پروگرام دیکھنے کی اجازت تھی اور یہ پروگرام رات آٹھ بجے سے پہلے پہلے ٹیلی کاسٹ ہو جایا کرتے تھے۔

اگر بیماری آزاری جیسی کوئی حقیقی مجبوری نہیں تو اسکول سے غیر حاضری تقریباً ناممکنات میں سے تھی اور ناغے کے بعد اسکول میں آمد پر غیر حاضری کے سبب سے متعلق درخواست بھی بستے میں ہونی ضروری تھی جس پر بچے کے سرپرست کے دستخط یا انگوٹھا لازمی تھا۔
اسکول کے اوقات کے بعد بھی بچے کی جان نہیں چھوٹتی تھی۔جو بچہ بعد از عصر محلے یا اسکول کے گراؤنڈ میں کسی گیم یا سرگرمی میں حصہ نہیں لیتا تھا اس کے بارے میں عمومی رائے یہی ہوتی کہ یا تو یہ بیمار ہے یا پھر جسمانی طور سے کمزور ہے۔اسکول میں پڑھنے والا کوئی بھی بچہ اگر شام کو ٹیوشن پڑھتا تھا تو اس کے بارے میں یہ تاثر بنتا چلا جاتا کہ شاید یہ اسکول کی پڑھائی میں پھسڈی ہے تب ہی تو اس کے والدین ٹیوشن دلواتے ہیں۔

والدین اور اساتذہ کے نزدیک جو باتیں کبیرہ گناہوں کی حیثیت رکھتی تھیں ان میں ہوم ورک مکمل نہ کرنا ، بچے سے گالم گلوچ سرزد ہونا، کسی بھی جاننے والے بڑے کو دیکھ کر سلام نہ کرنا ، دو بڑوں کی گفتگو کے بیچ بول پڑنا ، اکیلے یا ساتھی بچوں کے ساتھ کسی سینما گھر کے آس پاس پایا جانا ، کسی اجنبی سے مسلسل بات کرنا ، گلیوں میں بلا مقصد گھومتے پایا جانا، بازار سے کوئی شے بلا اجازت خرید کے وہیں کھڑے کھڑے کھا لینا ، پالتو جانوروں کو بلا جواز تنگ کرنا، پیسے یا کھانے پینے کی اشیا گھر میں یا گھر سے باہر چرانا۔

ان جرائم کی سزا میں سرزنش سے لے کر بول چال کی عارضی معطلی، دیوار کی جانب منہ کرکے کے کھڑا کیا جانا یا پھر پٹائی۔اس زمانے میں گھر یا اسکول میں سرزنشی پٹائی تربیت کا حصہ سمجھی جاتی تھی فوجداری جرم نہ بنی تھی۔تب ہی تو والدین بچے کو اسکول میں داخل کرواتے وقت دھڑلے سے کہتے تھے ’’ماسٹر صاحب ہمارا لخت جگر آپ کے حوالے۔ ہڈیاں آپ کی گوشت ہمارا‘‘۔بچے کو اس وقت اپنا باپ قصائی محسوس ہوتا تھا۔لیکن آج لگتا ہے کہ اس قصابی کے پیچھے کیسی محبت چھپی ہوئی تھی۔

جب میں آج اپنے یا دوسروں کے بچوں کے شب و روز دیکھتا ہوں تو اپنے بچپنے کی یادوں پر دکھ ہوتا ہے۔ہمیں گھر میں اکثر کفایت شعاری یا فضول خرچی جیسے الفاظ سننے پڑتے تھے۔آج کا بچہ دراصل اپنے والدین کا باپ یا ماں ہے۔وہ باقاعدہ والدین کو اپنی ہر پسند نا پسند کے بارے میں حکماً درخواست کرتا ہے اور والدین بہ رضا و رغبت اس بچے کی فرمائشی غلامی پر رضامند رہتے ہیں۔آج کے والدین یہ تصور ہی نہیں کرسکتے کہ بچے کی جا بے جا فرمائش دراصل محبت نہیں بلکہ اس کی زیرِ تعمیر شخصیت پر کتنا بڑا ظلم ہے۔آج کا بچہ نہ کے مطلب سے ناواقف اور صرف ہاں کے مطلب سے واقف ہے۔

ہمیں اپنے والدین سے کپڑے گندے یا میلے کرنے پر خوب سننا پڑتی تھیں لیکن آج کے بچے کو اس بارے میں کوئی تشویش نہیں کیونکہ اسے کپڑے دھونے کے صابن یا ڈیٹرجنٹ کے اشتہارات سے یہ تعلیم مل رہی ہے کہ داغ تو اچھے ہوتے ہیں۔اسے ہر ماہ نئے کپڑے دلانا والدین کا فرض ہے۔ اگر روزانہ نہیں تو ہر ہفتے ایک نیا کھلونا ضرور چاہئیے۔کس بچے کو اپنی عمر کے اعتبار سے کون سا کھلونا چاہیے اس کا فیصلہ بچہ خود کرتا ہے اور آج کل وہ پلاسٹک کی بندوق یا پستول وغیرہ سے کم پر راضی نہیں ہوتا کیونکہ اس کا دیگر ہم عمروں سے کڑا مقابلہ ہے۔وہ فٹ بال ، کرکٹ ، ہاکی یا بیڈ منٹن صرف ٹی وی پر دیکھتا ہے اور خود محلے یا خاندان کے بچوں کے ساتھ ٹیبلٹ یا ٹی وی پر پب جی یا ٹھا ٹھا والی گیمز کھیلتا ہے۔

باہر کب تک رہنا ہے اور رات کو کس وقت گھر لوٹنا ہے اس کا فیصلہ بھی بچے خود کرتے ہیں۔گھر آ کر ماں کے ہاتھ کا کھانا کھانا ہے یا باہر کا برگر آرڈر کرنا ہے اس کا فیصلہ بھی بچہ خود کرتا ہے۔رات کو وہ اپنے والدین کو سلا کر کمپیوٹر گیمز آف کرکے سوتا ہے اور صبح جب اسکول کے لیے روانہ ہوتا ہے تو آدھا سوتا جاگتا کلاس روم تک پہنچتا ہے۔

سرزنش ، سزا ، مار ، یہ اصطلاحات اس کے لیے اجنبی ہیں۔ ٹی وی ڈراموں یا فلموں سے لیے گئے ڈائیلاگ اس بچے کی لسانی ذہانت کے طور پر فخریہ انداز میں بتائے جاتے ہیں۔ٹیوشن نہ پڑھنے کا سبب والدین کی غربت تو ہو سکتی ہے بچے کی تعلیمی کمزوری ہرگز نہیں۔اسکول میں اگر گریڈ کم آرہا ہے تو یہ بچے کا نہیں ٹیچر یا اسکول کا قصور ہے۔اگر محلے سے اس کی کوئی شکایت آئی ہے تو اس کا مطلب ہے کہ ہمسائے اس سے جلتے ہیں۔

اب مجھے کوئی حیرانی نہیں ہوتی جب میں عزیزوں کے دس بارہ سالہ بچے کے ہاتھ میں موبائیل فون دیکھتا ہوں جو اسے سالگرہ پر اس کی کسی آنٹی یا انکل کی جانب سے تحفے میں ملا۔اس کی میز پر کتاب کے بجائے ٹیبلٹ دیکھتا ہوں جس میں کتاب نہیں بلکہ گیمز ڈاون لوڈ ہوتے ہیں۔اس کی کلائی پر گھڑی دیکھتا ہوں ،گویا کسی کارپوریٹ میٹنگ میں پہنچنے سے دیر نہ ہوجائے۔ایک چودہ برس کے بچے کی ذاتی موٹر سائیکل دیکھتا ہوں اور حیرانی نہیں ہوتی کیونکہ اس کے ساتھ کے بچوں کے پاس تو اپنی ذاتی کاریں اور مسلح محافظ ہیں۔