پوری دنیا کی مادری زبانوں کے نام

او کہندی سی
جہڑی پھُلاں وِچ خَوشبواں رہندی سی
ستو یں شام توں اَگّے کوئی رات نئیں
ستویں دن دی شام نوں مِلنا
ست رنگ دیہاڑے ہَس ہَس کھِڑنا
جَھلیےپَکھیے!
ایس توں چنگی کوئی بات نئیں!

او کہندی سی
جہڑی دریاواں دے نال
سمندراں تک وَیندی سی
سب سنگاں توں وَدھ کے سنگ اے
دل دریا دی چَھّلاں دا
ماکھیوں مِٹھیاں گَلاں دا

او کہندی سی
جیہڑی ہسدیاں ہسدیاں رو پَیندی سی
دو تریھائے بُلھاں اُتے
دل دریا ہِک پھواں اَتھرو
جس و چ ست سمندر
پِیڑ لُکا کے رہندے نیں
او کہندے نیں
ست نوں زہر پیالہ پِینْا پیندا اے
تاں صدیاں تک جیندارہندا اے!

او کہندی سی
جیہڑی پِینگ ہُلارے
اَسماناں دے لیندی سی
سب سُکھاں تُوں سوھنا سُکھ اے
من مرضی دا قیدی رہنْا
سُکیاں زِمیاں دا دُکھ سہنْا
وگدیاں رہنْا

او کہندی سی
جیہڑی سَتوِیں بُرجی دے وچ رہندی سی
نِکیاں نِکیاں غَرضاں خاطَر
بَھورا بَھورا
جیوندیاں رہنْا
پِہلیاں وانگوں
لالچ کٹھیاں کردیاں رہنْا
ٹِکیاں پِچھے نسدیاں رہنْا
جینْاں اے؟
یا فِـــــــــر جَھل!
سدھراں آلی سنگل
گل وچ پا کے
وِچ بزاراں نچدیاں رہنْا
نِکے نِکےقاروناں دے
پیراں اُتے ڈھندیاں رہنا