شعر، مرزا غالب
یک قلم کاغذ ِ آتش زدہ ہے صفحہ ء دشت
نقش ِ پا میں ہے تپِ گرمی ء رفتار ہنوز

نظم، ستیہ پال آنند
کس قدر شعلہ بجاں ہے دم ِ تخلیق کا کرب
آگ اگلتا ہوا یہ آپ کا قُقنس نامہ
نطقہ ء حارہ ہے یا آتش ِ آذر کی ہے آنچ
آپ کیا کہتے ہیں اس شعر کے بارے میں ، حضور؟

مرزا غالب
یک قلم کاغذ ِ آتش زدہ اور میرا قلم
ایک لمحے کے ہی گلخن میں سلگ جاتے ہیں
یہی تفسیر ہے اس شعر کی ، اے ستیہ پال
دشت کی مثل ہو ، تمثال کف ِ پا کی ہو
عقب میں ان کے تو کاغذ ہے یا پھر خامہ ہے
سب اسی ایک ہی تسبیح کے دانے ہیں ، عزیز

ستیہ پال آنند
کچھ تو فرمائیے اس طور معانی کے لیے
کیا ’’مراعات ‘‘ ہیں یا ــ’’سادگی و پرکاری‘‘ـ؟

مرزا غالب
یہ “مرا عات” ہی ہیں جن کی “نظیر ” اظہر ہے
دیکھیں تو “صفحہ” ، “قلم “، “نقش” ، بھی اور “کاغذ” بھی
اور پھر آگے چلیں، دیکھیں تو “پا” اور “رفتار
کچھ ذرا اور بڑھیں آگے ، تو ہے آتشیں دشت
اب بھی گر آپ نے سمجھا نہیں تو، میرے عزیز
آپ کے واسطے میں صدقہ ہی دے سکتا ہوں

ستیہ پال آنند
واہ، اے دیدہ ور استاد، اے با ذوق علیم
ان “مراعات” کی تو اپنی “نظیر” آپ ہی ہیں
ہاں، مگر اتنی اجازت تو مجھے دیں کہ استفسار کروں
اور کیا کچھ ہے کہ جو اس شعر کی تفسیر میں ہے

مرزا غالب
گرمی ٗ نقش ِ قدم ایک کسوٹی ہے کہ جو
دشت پیمائی کی رفتار کی شاہد ہے، میاں
گرمی ء سینہء صحرا ہے وہ آلہ جس سے
دشت پیمائی کی وسعت کا پتہ چلتا ہے
یہی میزان کا ’’گز ماپ‘‘ ہے ، تخمینہ ہے
’’یک قلم کاغذ ِ آتش زدہ ‘‘اور ـصفحہ ٗ دشت‘‘
مستوی صورتیں گرمی کی ہیں، لیکن دراصل
ان سے تخلیق کا آتش کدہ بھی ہے مقصود

تبصرہ ۔۔شمس الرحمن فاروقی
ایک برقی مکتوب کے کچھ حصص، جس کے متن سے غیر متعلق مواد، شخصی ، ذاتی،اور دیگر موضوعات اور شخصیات کے بارے میں مواد مِنہا کر دیا گیا اور صرف اس شعر سے متعلق مر حوم کے ارشادات کو روا رکھا گیا۔

آپ کی نظم کڑے سے کڑے معیار پر بھی پوری اترتی ہے۔آخری سطر تو گویا نظم کی تاویل، تشریح و توضیح ایک ہی جملےمیں کر تی ہے۔۔۔ ” تخلیق کا آتش کدہ” ایک خوبصورت اصطلاح ہے۔ میر ا خیال یہ ہے کہ اس شعر میں صرف عاشق کی گرم رفتاری کا مذکورنہیں ہے، یہ تصویر معشوق کی رفتار کی بھی ہو سکتی ہے۔ یہ نقش ِپا کس کا ہے، جس میں گرمی رفتار کا ، “تپ” ابھی تک موجود ہے؟ عاشق کا، جسے معشوق تلاش کرتا ہوا دشت پیمائی کر ر ہا ہے یا معشوق کا جو عاشق کی تلاش میں نکلا ہوا ہے،؟

ایک نکتہ اور بھی ہے، جسے کسی شارح نے ، (بشمولیت آپ کے)، گرفت میں لانا مناسب نہیں سمجھا۔ لفظ “تپ” (دہلی کی زبان میں ، غالب کے زمانے میں بھی اور آج بھی) “بخار” کے معنی میں استعمال ہوتا ہے جسم کا درجہ ء حر ارت جیسے کہ “معیادی بخار” وغیرہ۔ اس شعر کے داخلی اور بیرونی تناظر میں یہ کس حد تک صحیح ہے، میں اس پر کچھ کہنے سے قاصر ہوں ۔

غالب نے تو نقش اورآتش زدہ کاغذ کا تعلق خاطر شعر میں ہی بہ احسن و خوبی بیان کر دیا تھا،لیکن آپ نے مراعات النظیر کے بارے میں جو کچھ اپنی نظم اس بے بدل شاعر سے کہلوایا ہے، وہ بھی ایک خاصے کی چیز ہے۔