آنگ سانگ سوچی جنرل اونگ سنگ کی بیٹی ہیں، انہوں برما کی جنگِ آزادی لڑی اور بڑی جدوجہد کے بعد برما کو برطانوی استعمار سے نجات دلانے میں کامیاب ہوئے۔ یہ برطانیہ منتقل ہوگئیں اور 1988ء میں برما واپس لوٹیں، جب برما میں فوجی آمریت عروج پر تھی۔ ان کے آتے ہی بڑے پیمانے پر مظاہرے شروع ہوگئے، آرمی نے بڑی بے دردی سے برما کی عوام کے مظاہروں کو کچل دیا، اس آپریشن میں ہزاروں لوگوں مارے گئے۔ آنگ سانگ سوچی نے نیشنل لیگ فار ڈیموکریسی کی بنیاد رکھی، اس کے چند ماہ بعد ہی انہیں گرفتار کر لیا گیا۔ 1990ء کے الیکشن ان کی پارٹی نے جیت لیے مگر انہیں اقتدار منتقل نہیں کیا گیا۔ اس طرح پندرہ سال ہاوس اریسٹ میں گزارے، اسی جدو جہد کی وجہ سے انہیں نوبل پرائز سے نوازا گیا۔ 2012ء میں ممبر اسمبلی منتخب ہوئیں، 2015ء کے جنرل الیکشن میں ان کی پارٹی جیت گئی، جس کے بعد ملٹری کے ساتھ باقاعدہ شراکت اقتدار کا معاہدہ ہوا۔ ان کے اقتدار کے باوجود سیاسی قیدی اسی طرح جیلوں میں رہے، صحافی تشدد کا شکار ہوئے۔ آنگ سانگ سوچی کا سب سے بڑا جرم یہ ہے کہ صرف اقتدار سے چپکے رہنے کے لیے انہوں نے روہنگیا مسلمانوں کی نسل کشی کا دفاع کیا۔

یقیناً آپ کو یاد ہوگا کہ 2017ء برما کے روہنگیا مسلمانوں پر عرصہ حیات تنگ کر دیا گیا تھا۔ دہشتگردی کے خلاف آپریشن کے نام پر مسلمانوں کی بستوں کو تہس نہس کر دیا گیا، ایسا ظالمانہ فوجی آپریشن کیا گیا، جس کی بربریت کی مثال نہیں ملتی۔ یہ آپریشن اس حوالے سے بھی انسانیت کش تھا کہ اس میں فوج کے ساتھ ساتھ مقامی انتہاء پسندوں نے مسلم آبادیوں پر حملے کیے۔ یہ لوگ مسلمان آبادیوں کو آگ لگاتے اور مسلمان خواتین کی آبرو ریزی کرتے تھے۔ آج بھی آنکھیں آنسووں سے بھر آتی ہیں کہ لاکھوں کی تعداد میں برما کے مسلمان بے سروسامانی کے عالم میں بنگلہ دیش میں داخل ہو رہے ہیں۔ اس بربریت کے نتیجے میں ساڑھے سات لاکھ روہنگیا مسلمان برما سے ہجرت کرنے پر مجبور ہوئے اور بنگلہ دیش کے کیمپوں میں مقیم ہیں۔

آنگ سانگ سوچی نے میانمار کی فوجی کارروائی کا انٹرنیشنل کورٹ آف جسٹس میں دفاع کیا تھا اور اس نسل کشی کے مقدمے میں فوج کا ساتھ دیا تھا۔ آج اسی فوج نے ان کو گرفتار کر لیا ہے اور کسی بھی طور پر انہیں حکومت دینے کے لیے تیار نہیں ہے۔ عجیب بات یہ ہے کہ فوج دھاندلی کا الزام لگا رہی ہے، یہ شائد دنیا میں واحد ملک ہوگا، جس کی فوج دھاندلی کا الزام لگا کر منتخب حکومت کا تختہ الٹ رہی ہے۔ دنیا بھر سے آوازیں اٹھی تھیں کہ جس طرح برما کی فوج کے مظالم کو آنگ سانگ سوچی نے دفاع کیا ہے، اس کے بعد یہ نوبل نہیں رہیں، اس لیے ان سے نوبل پرائز کا اعزاز واپس لیا جائے۔ آنگ سانگ سوچی پانچ سال مسلسل حکومت کرتی رہیں، انہوں نے روہنگیا کے لیے کوئی عملی قدم نہیں اٹھایا۔ ان کا خیال تھا کہ وہ اس طرح فوج کی خوشامد کرکے اپنے اقتدار کو طول دے سکتی ہیں اور تھوڑا بہت شائد وہ اس میں کامیاب بھی ہوئیں کہ پانچ سال کی ایک مدت ِاقتدار انہوں نے مکمل کر لی۔

انسان کو اقتدار کی بجائے اقدار کی سیاست کرنی چاہیئے، کیونکہ اقتدار عارضی و فانی چیز ہے، اقدار انسان کو نہ بھولنے والا بنا دیتی ہیں۔ دنیا آنگ سانگ سوچی کا احترام کرتی تھی، مشرق و مغرب میں ان کے نام کا ڈنکہ فقط ان کی اقدار کی وجہ سے تھا مگر جیسے ہی انہوں نے اپنا ٹریک تبدیل کیا اور اقتدار کے پیچھے بھاگنے لگیں، اقدار کو بھلا دیا، خونِ مسلم ان کے مقابل آگیا اور آج اقتدار چھِن چکا ہے اور وہ پھر سے قید تنہائی کا شکار ہوگئی ہیں۔ ان کے تمام ساتھی بھی گرفتار ہوچکے اور ان کی جماعت آمرانہ جبر کا شکار ہوگئی ہے۔ آنگ سانگ سوچی صاحبہ اگر آپ نے مظلوم مسلمانوں کے لیے آواز بلند کی ہوتی تو آج آپ کے پاس اقتدار ہوتا یا نہ ہوتا، عزت ضرور ہوتی، جس سے آج آپ محروم ہوچکی ہیں۔ یہ روہنگیا کے مظلوم مسلمانوں کے لہو کا انتقام ہے، جو آج آپ قابل رحم حالت میں ہیں۔

روہنگیا کے یہ مظلوم مسلمان آج بھی تنگی کا شکار ہیں۔ انڈیا میں پناہ لی تو وہاں شہریت کا قانون آگیا، جس میں دعویٰ یہ کیا گیا تھا کہ پسے ہوئے طبقے کو شہریت دی جائے گی، مگر انڈیا کی ہندتوا حکومت نے برما کو اس لسٹ میں ہی شامل نہیں کیا، جہاں کے شہریوں کو شہریت دی جائے گی۔ اسی طرح یہ لوگ بنگال میں بھی مسائل کا شکار ہیں اور کیمپوں میں محرومیت کی زندگی بسر کر رہے ہیں۔ ایک بات یہ بھی کی جا رہی ہے کہ یہ انٹرنیشنل گیم کا حصہ ہے، چین بڑی تیزی سے برما کے ذریعے خلیج بنگال تک ایک تجارتی راہداری تعمیر کر رہا ہے۔ اس راہ داری میں رخنہ ڈالنے کے لیے برما کے حالات اس طرف لے جائے جا رہے ہیں کہ افرا تفری ہو اور چائنہ اسے مکمل نہ کرسکے۔