• صفحہ اول
  • /
  • نگارشات
  • /
  • سال 2020 میں پاکستان کی وہ اہم شخصیات جو اس دنیا سے رخصت ہوگئیں۔۔سید عمران علی شاہ

سال 2020 میں پاکستان کی وہ اہم شخصیات جو اس دنیا سے رخصت ہوگئیں۔۔سید عمران علی شاہ

پروردگارِ عالم نے پوری کائنات کے نظام  کو وقت کا پابند بنایا ہے، ہر نئے آنے والے دن کا سورج اپنے ساتھ بہت سی امیدوں کو روشن کرتا ہے،  اسی طرح دن مہینے اور سال کے بدلنے کا سلسلہ جاری و ساری ہے اور تاقیامت یہ سلسلہ ایسے ہی چلے گا، ہر روز دنیا میں لاکھوں نفوس آنکھ کھولتے ہیں تو لاکھوں اس دنیا سے کوچ کرجاتے ہیں، ویسے تو وقت کے ہر ایک پل کی اپنی اہمیت ہے، مگر کچھ لمحے اور پل ناقابل فراموش ہوجاتے ہیں، سال 2020 بھی کچھ ایسا ہی ثابت ہوا، دسمبر 2019 کے آخری ایام کے دوران Covid-19 کی شکل میں چین کے صنعتی شہر ووہان سے اٹھنے والا مہلک وائرس، سال 2020 پر آسیب کے خوفناک سائے سے کم ثابت نہ ہوا، Covid-19 کی وجہ سے تاریخ میں پہلی بار پوری دنیا کو  مکمل طور پر جمود کا شکار کردیا، کاروبار دنیا معطل ہو کر رہ گیا، امریکہ، چین، اٹلی، جرمنی اور فرانس جیسے بڑے ممالک کی معیشت ہل کر رہ گئی، یہ سال ویسے تو  کئی حوالوں سے دنیا کے لیے اچھا سال ثابت نہیں ہوا، اس سال  ملک کی بہت سی  نامور اور نہایت معتبر شخصیات ہم سے جدا ہو گئیں۔
نئے سال کے آغاز پر سیاست و سماج، ادب و ثقافت کے میدان کی ان شخصیات کی یاد تازہ کرتے ہیں‌ جو اب ہمارے درمیان موجود نہیں۔اسی سال دنیا بھر میں پھیلی کورونا وائرس کی وبا کے باعث متعدد شخصیات بھی اس کا نشانہ بنیں

جسٹس(ر) فخرالدین جی ابراہیم
معروف قانون دان، سابق اٹارنی جنرل اور سابق چیف الیکشن کمشنر جسٹس ریٹائرڈ فخرالدین جی ابراہیم 7 جنوری 2020 کو اس دنیائے فانی سے رخصت ہوئے۔ وہ بھارتی گجرات کے شہر احمد آباد میں 1928 میں پیدا ہوئے، ان کی عمر 91برس تھی۔

tripako tours pakistan

تحریک انصاف کے بانی رہنما نعیم الحق
وزیر اعظم عمران خان کے معاون خصوصی برائے سیاسی امور اور تحریک انصاف کے سینئر رہنما نعیم الحق 15فروری 2020 کو علالت کے باعث کراچی کے اسپتال میں انتقال کرگئے۔

سابق میئر کراچی نعمت ا ﷲ خان
کراچی کے سابق میئر اور جماعت اسلامی کے مرکزی رہنما نعمت اللہ خان 90 برس کی عمر میں25فروری 2020 کو انتقال کرگئے تھے۔ اگست 2001 سے جون 2005 تک کراچی کے میئر رہنے والے نعمت اللہ خان عرصہ دراز سے علیل تھے۔ وہ پیشے کے اعتبار سے وکیل اور الخدمت فاؤنڈیشن کے صدر بھی رہے۔

کامیڈین مزاحیہ اداکار امان ا ﷲ
ملک کی شوبز انڈسٹری کا بڑا نام اور کامیڈین لیجنڈ، مزاح کے شہنشاہ اور تھیٹر کے بادشاہ امان اللہ 6 مارچ 2020 کو 70 برس کی عمر میں وفات پاگئے، امان ﷲ نہایت اعلیٰ پائے کے انسان تھے، تھیٹر انڈسٹری کے بہت سارے لوگ امان ﷲ کے ممنون ہیں اور تاحیات ان کی راہنمائی اور محبت کے مقروض رہیں گے۔

معروف اداکار اطہر شاہ خان جیدی
ممتاز شاعر، ڈرامہ نگار اور معروف فن کار اطہر شاہ خان عرف جیدی ( تمغہ حسن کارکردگی) 10مئی2020 کو دنیائے فانی سے کوچ کرگئے ان کی عمر 77سال تھی۔ اطہر شاہ خان یکم جنوری 1943 کو بھارت کی ریاست رام پور میں پیدا ہوئے تھے۔ اطہر شاہ خان جیدی کا معروف کردار انکی پہچان رہا۔

اداکارہ صبیحہ خانم
ماضی کی خوبصورت اور معروف اداکارہ صبیحہ خانم 13جون 2020 کو امریکا کے ایک اسپتال میں دوران علاج انتقال کر گئیں، صبیحہ خانم 1935 میں گجرات میں پیدا ہوئیں ان کی عمر 84برس تھی۔

معروف ٹی وی کمپیئر طارق عزیز
پاکستان کے مایہ ناز ٹی وی کمپیئر طارق عزیز 17جون 2020کو خالق حقیقی سے جاملے ان کی عمر 84 برس تھی، طارق عزیز ادیب، شاعر اور سابق رکن قومی اسمبلی بھی تھے، انہوں نے کئی فلموں میں اپنی اداکاری کے جوہر بھی دکھائے۔ طارق عزیز پاکستان کا فخر ہیں اور ان طرہ امتیاز ان کی پاکستان سے والہانہ محبت و عشق ہے، وہ اپنی وفات سے قبل اپنے تمام اثاثے، اپنے پیارے وطن پاکستان کے نام کر گئے تھے، طارق عزیز، اہل وطن کے دلوں میں ہمیشہ سلامت رہیں گے

عالم دین مفتی محمد نعیم
جامعہ بنوریہ کراچی کے مہتمم اور معروف عالم دین مفتی محمد نعیم20جون 2020 کو انتقال کرگئے، وہ 1958 کو  کراچی میں پیدا ہوئے، ان کی عمر 62سال تھی۔ ان کا آبائی تعلق بھارتی گجرات کے علاقے سورت سے تھا۔

معروف عالم ِدین علامہ طالب جوہری
معروف عالم ِدین اور ذاکر علامہ طالب جوہری انتقال22جون 2020 کو کراچی کے اسپتال میں خالق حقیقی سے جاملے،  علامہ طالب جوہری 27 اگست 1939ء کو پیدا ہوئے، ان کے والد مشہور عالم دین علامہ مصطفیٰ خاں جوہر تھے۔

سینئر سیاستدان سید منور حسن
سابق امیر جماعت اسلامی پاکستان سید منور حسن 26جون2020 کو اس دنیا کو خیرباد کہہ گئے، 5 اگست 1941 کو پیدا  ہونے والے سید منور حسن کا تعلق دہلی کے ایک اعلیٰ تعلیم یافتہ، متمول اور دینی اقدار کے حامل خاندان سے تھا جس نے  پاکستان کے قیام کے بعد کراچی میں سکونت اختیار کی، ان کی عمر 79برس تھی۔

پی پی رہنما آیت اللہ درانی
پیپلزپارٹی کوئٹہ کے مرکزی رہنما اور سابق وفاقی وزیر آیت اللہ درانی5جولائی کو انتقال کر گئے، ان کی عمر 64 برس تھی۔
وہ گزشتہ چندروز سے کوئٹہ کے نجی اسپتال میں زیر علاج تھے۔

نامور شاعر پروفیسر عنایت علی خان
مسکراہٹیں بکھیرنے والے معروف شاعر اور استاد پروفیسر عنایت علی خان26جولائی کو خالق حقیقی سے جا ملے۔
مرحوم کی عمر 85 برس تھی اور وہ کئی ماہ سے علیل تھے۔
وہ 1935 میں بھارتی ریاست ٹونک میں پیدا ہوئے تھے، اور نومبر 1948 میں ہجرت کے بعد سندھ کے شہر حیدرآباد میں
سکونت اختیار کی۔

سینئر سیاستدان سینیٹر حاصل بزنجو
بلوچستان کے سینئر سیاست دان نیشنل پارٹی کے مرکزی رہنما سینیٹر میر حاصل خان بزنجو20اگست کو انتقال کر گئے ہیں۔ وہ پھیپٹروں کے سرطان میں مبتلا تھے۔ میر حاصل خان بزنجو 3 فروری 1958 کو بلوچستان کے علاقے نال میں پیدا ہوئے، ان عمر 62سال تھی۔

معروف مذہبی اسکالر  علامہ ضمیراختر نقوی
معروف مذہبی اسکالر اور نامور خطیب علامہ ضمیر اختر نقوی13ستمبر 2020 کو دل کا دورہ پڑنے سے انتقال کرگئے۔
علامہ ضمیر اختر نقوی 24 مارچ 1944 کو بھارتی شہر لکھنؤ میں پیدا ہوئے، ان کی عمر 76 برس تھی۔

معروف اداکار مرزا شاہی
ٹی وی کے معروف مزاحیہ اداکار مرزا شاہی29 ستمبر کو کراچی میں انتقال کرگئے، ان کی عمر 70 سال تھی۔ وہ گزشتہ کئی روز سے سول اسپتال میں زیر علاج تھے۔

پی پی رہنما راشد حسین ربانی
پاکستان پیپلز پارٹی کے سینئر رہنما اور وزیراعلیٰ سندھ کے معاون خصوصی راشد حسین ربانی15اکتوبر کو کورونا وائرس میں مبتلا ہونے کے باعث کراچی کے مقامی ہسپتال میں انتقال کرگئے۔ ۔ راشد ربانی کی عمر 67 برس تھی۔

تائیکوانڈو پلیئر ماہم آفتاب
پنجاب کے شہر وہاڑی سے تعلق رکھنے والی تائیکوانڈو پلیئر ماہم آفتاب 23 اکتوبر کو انتقال کرگئیں، وہ برین ٹیومرکے علاج کے سلسلے میں شوکت خانم اسپتال میں زیر علاج تھیں۔
26سالہ ماہم آفتاب نے نیشنل و انٹرنیشل سطح پر تائیکوانڈو میں پاکستان کی نمائندگی کی، انہیں “دختر وہاڑی” کے لقب سے بھی پکارا جاتا تھا۔

پی پی رہنما جام مدد علی
پاکستان پیپلز پارٹی کے ایم پی اے جام مدد علی کرونا وائرس کا شکار ہونے کے بعد 13نومبر کو خالق حقیقی سے جاملے، وہ سانگھڑ کی نشست پر منتخب ہوئے تھے، ان کی عمر57 برس تھی اور وہ پچھلے کئی روز سے کراچی کے ایک اسپتال میں زیر علاج تھے۔

معروف فلم ساز اقبال کاشمیری
پاکستان فلم انڈسٹری کے سینئر ڈائریکٹر اور نامور فلم ساز اقبال کاشمیری15نومبر کو انتقال کر گئے، ان کے اہلِ خانہ کے مطابق انہیں‌ گردوں کا عارضہ لاحق تھا اور وہ گزشتہ ہفتے سے اسپتال میں زیرِ علاج تھے۔اقبال کاشمیری نے 4 بیٹیاں اور 2بیٹے سوگوار چھوڑے ہیں۔

علامہ خادم حسین رضوی
تحریک لبیک پاکستان کےسربراہ علامہ خادم حسین رضوی19نومبر کو دل کا دورہ پڑنے کے باعث انتقال کرگئے، وہ22 جون 1966کو ضلع اٹک میں پیدا ہوئے تھے۔ ان کی عمر 54برس تھی۔
علامہ خادم حسین رضوی کا جنازہ پاکستان کی تاریخ کے بہت بڑے جنازوں میں سے ایک تھا

نواز شریف کی والدہ بیگم شمیم اختر
سابق وزیر اعظم میاں محمد نواز شریف کی والدہ بیگم شمیم اختر 22 نومبر کو لندن میں انتقال کر گئیں، ان کی عمر 93 برس تھی،

پی پی رہنما چوہدری احمد مختار
پیپلزپارٹی کے سینئررہنما اور سابق وفاقی وزیرچوہدری احمد مختار25نومبر کو لاہور میں انتقال کرگئے، چوہدری احمد مختار پیپلز پارٹی میں ذوالفقارعلی بھٹو اور بینظیر بھٹو کے ساتھ سیاست میں متحرک رہے اور طویل عرصے سے علالت کے باعث عملی سیاست سے کنارہ کشی اختیار کرچکے تھے۔

ماہر لسانیات ڈاکٹرغلام علی الانا
لسانیات اور تحقیق پر ایک درجن سے زائد کتابیں تصانیف  لکھنے والے ماہر لسانیات ڈاکٹرغلام علی الانا 29 نومبر کو کراچی میں انتقال کرگئے۔ ڈاکٹرغلام علی الانا 1930 میں ضلع سجاول کے گوٹھ تڑخواجہ میں پیدا ہوئے، ان کی عمر 90برس تھی۔

سابق وزیر اعظم میر ظفر اللہ خان جمالی
سابق وزیر اعظم میر ظفر اللہ جمالی2دسمبر کو اسلام آباد کے ایک اسپتال میں خالق حقیقی سے جاملے، ان کی عمر 76 برس تھی۔ میر ظفر اللہ خان جمالی یکم جنوری 1944 کو بلوچستان کے علاقے روجھان جمالی میں پیدا ہوئے۔

سابق جج  احتساب عدالت *ارشد ملک
نواز شریف کو سزا سنانے والے احتساب عدالت کے سابق جج ارشد ملک کرونا وائرس انفیکشن کے باعث 4 دسمبر کو اسلام آباد کے ایک اسپتال میں انتقال کر گئے۔

سینئر سیاستدان شیرباز خان مزاری
بلوچستان کے بزرگ سیاست دان اور قومی اسمبلی کے سابق قائد حزب اختلاف سردار شیر باز مزاری5دسمبر کو کراچی ایک اسپتال میں دوران علاج انتقال کرگئے۔

شیخ الحدیث مفتی زر ولی خان
جامعہ احسن العلوم کراچی کے مہتمم معروف علمی شخصیت شیخ الحدیث والتفسیر مفتی زر ولی خان 7 دسمبر کو کراچی کے ایک اسپتال میں انتقال کرگئے۔وہ 3 ماہ سے شدید علیل تھے، مفتی زر ولی کی عمر 67 برس تھی۔

تاجر رہنما سراج قاسم تیلی
معروف تاجر رہنما سراج قاسم تیلی8دسمبر کو دل کا دورہ پڑنے سے دبئی میں انتقال کرگئے وہ دبئی میں طبیعت خراب ہونے پر2 روز سے اسپتال میں زیرعلاج تھے، سراج قاسم تیلی7 مئی 1953 کو کراچی میں پیدا ہوئے، ان کی عمر 67برس تھی،

سابق کرکٹر شاہد محمود
ایک اننگز میں 10 وکٹیں لینے کا اعزاز حاصل کرنے والے پاکستان *سابق کرکٹر شاہد محمود* 14دسمبر کو امریکی ریاست نیوجرسی میں انتقال کر گئے، وہ پہلے پاکستانی بولر تھے جنہوں نے فرسٹ کلاس میچ میں 10 کھلاڑیوں کو پویلین کی راہ دکھائی، 17مارچ 1939 کو لکھنؤ میں پیدا ہونے والے شاہد محمود کی عمر 81برس تھی۔

سینئر اداکارہ فردوس بیگم
پاکستان فلم انڈسٹری کی سینئر اداکارہ فردوس بیگم16دسمبر کو لاہور میں انتقال کرگئیں، دو روز قبل فردوس بیگم کو برین ہیمرج ہوا تھا، اداکارہ فردوس بیگم 4 اگست 1947 کو لاہور میں پیدا ہوئیں، ان کی عمر 73 سال تھی۔

سینئر صحافی طارق محمود
پاکستان کے سینئر صحافی طارق محمود اسلام آباد کے اسپتال میں 17 دسمبر کو خالق حقیقی سے جاملے، کورونا وائرس سےمتاثرہ صحافی مقامی اسپتال میں زیر علاج تھے۔ مرحوم طارق محمود اے آر وائی نیٹ ورک سے بھی منسلک رہے، اس کے علاوہ وہ کئی ملکی اخبارات اور نشریاتی اداروں سے وابستہ رہے۔

Advertisements
merkit.pk

یہ تمام وطن عزیز وہ نادر و نایاب لوگ ہیں کہ جو اس دار فانی سے رخصت ہو چکے ہیں ، پروردگار ان سب کی مغفرت فرمائے۔
خدا کرے کہ نیا آنے والا سال 2021 ملک پاکستان کے لیے ترقی و عروج لے کر آئے ، اور اس مہلک وباء نوول کورونا وائرس سے اور اس جیسی تمام مہلک وباؤں سے ہمیشہ ہمیشہ محفوظ رہنے کا سال ثابت ہو، خدا کرے کہ سال2021 مسلم دنیا کی یگانگت، اتحاد اور دائمی امن کا سال بنے،آمین!

  • merkit.pk
  • merkit.pk

imran.ali
نام - سید عمران علی شاہ سکونت- لیہ, پاکستان تعلیم: MA International Relations , MBA, B.Ed, M.A Special Education شعبہ-ڈویلپمنٹ سیکٹر شاعری ,کالم نگاری، مضمون نگاری، موسیقی سے لگاؤ "تیری باتیں کمال رکھتی ہیں , میری سانسیں بحال رکھتی ہیں"

بذریعہ فیس بک تبصرہ تحریر کریں

Leave a Reply