کس پردے میں ہےآئینہ پرداز ، اے خدا
رحمت کہ عذر خواہ لب ِ بے سوال ہے
۔۔۔۔۔۔۔۔۔۔

طالبعلم ایک
تسلیم، “عذر خواہ لب ِ بے سوال” ہے
لیکن یہ عذر کیا ہے جو لب سے بعید ہے؟

طالبعلم دو
ہے یہ کمال ِ فن کہ تجسس بھی ہے بہت
لیکن یہ عذر ِ لنگ بھی حاضر ہے رو برو
“رحمت” کی یہ دعا بھی ہے تہلیل و تراویج
اور انکسار و بندگی بھی ہیں رضا طلب
لیکن ہے پھر بھی یہ دعا الفاظ سے بعید
رحمت ہو مجھ پہ ، میرا لبِ بے سوال ہے

طالبعلم ایک
الفاظ سے بعید ہے، لیکن کمال ہے

طالبعلم دو
یہ عذر خواہ لب کہ ہے ہشیار بھی بہت
اور چاہتا ب بھی ہے کہ وہ تاویل پا سکے
اور جان لے کہ کون سا پردہ ہے در میان
مخفی ہے جس کے پیچھے وہ آئینہء معاد
جو اُس کو “غیر حال” سے آگاہ کر سکے
“فر د ا روی کا تفرقہ” یکدم مٹا سکے

استاد ستیہ پال آنند
“پرداز” بھی کیا لفظ ہے آئینے کی تمہید
یعنی شروع، پہل، خدو خال، چال ڈھال
اُس آئینے کے سامنے جو پردہ دَر نہیں
وہ آئینہ جو عیب چھپاتا بھی ہے، مگر
بے پردگی سے بھی جسے پُرخاش تک نہیں