کہتے ہیں۔۔۔ڈاکٹر ستیہ پال آنند

SHOPPING

اگر مجھ جیسے شاعر کو مصرع طرح دے کر یہ کہا جائے کہ اس پر طبع آزمائی کرو تو وہ یہی کچھ لکھ سکے گا۔ کچھ بر س پہلے غالب اکادمی (مسی ساگا) کینیڈا کے مرحوم دوست اطہر رضوی کی، فرمائش پر کہی گئی ایک منظوم کاوش، جو غزل ہے بھی اور نہیں بھی۔

باد صرصر کو بھی یہ لوگ صبا کہتے ہیں
گرد کی آندھی کو گھنگھور گھٹا کہتے ہیں

شاعروں کو اگر قبروں کا دیا کہتے ہیں
لوگ بے وجہ نہیں کہتے، بجا کہتے ہیں

آئینہ مصلحت ِوقت کا قائل ہی نہیں
اس لیے لوگ اسے “عکس سرا” کہتے ہیں

میرے اطراف تو سیارے بہت گھومتے ہیں
کہکشاؤں میں مجھے چرخ نما کہتے ہیں

موتیوں سے جو چمکتے ہیں مری پلکوں پر
آنسوؤں کو ہی چراغوں کی ضیا کہتے ہیں

میرے سینے میں دہکتی ہوئی نظمیں ہیں بہت
اس لیے لوگ مجھے دل کا جلا کہتے ہیں

۔۔۔۔۔۔۔۔۔۔۔۔۔۔۔۔۔۔۔

یہ فلک بوس عمارات، یہ ٹاور، یہ محل
دیکھ، ان سب کو، مرے دیدہ ء اصنام پرست
کون کہتا ہے کہ گئے لات و منات و مردوخ
ان کو اب تیل کی دولت کے خدا کہتے ہیں

۔۔۔۔۔۔۔۔۔۔۔۔۔۔۔۔۔۔۔

وقت کے ہاتھ ہیں اک عرصہ سے مصروف ِ ستم
کچھ برس اور ہی کاٹے گی مری عمر ِ عزیز
زندگی بھر تو رہا عشق ِ بتاں میں مصروف
عمر ساری تو نہیں اٹھے دعا کو مرے ہاتھ
کچھ سمجھ آتا نہیں، اے فلک ِ سیر نگاہ
کیا دم نزع کی سانسوں کو دعا کہتے ہیں؟

۔۔۔۔۔۔۔۔۔۔۔۔۔۔۔۔۔۔۔۔۔

آب ِزمزم کو ہلاہل کہیں بے باکی سے
شہد کا گھونٹ سمجھ کر سم ِ قاتل پی جائیں
آپ گرویدہ ء گفتار ہیں خود اپنے ہی
آپ تو خود کو ہی آئینہ نما کہتے ہیں

۔۔۔۔۔۔۔۔۔۔۔۔۔۔۔۔۔۔۔۔۔

حسن کے عیش کدے اور طلسمات ِ حیات
ان کے ہوتے ہوئے کیوں عیش سے محروم رہوں
جسم، احساس، طلب، یاد، جوانی، سپنے
لوگ ان جذبوں کو ہی ہوش ربا کہتے ہیں

۔۔۔۔۔۔۔۔۔۔۔۔۔۔۔۔۔۔۔۔۔۔

جانتے بوجھتے کیوں دل کو نہتا کر لوں
زندگی مصرف ِ بے کار رہی ہے، پھر بھی
یاد یہ قول رکھوں، مجھ کو ابھی جینا ہے
یہ مرا جذبہء اصنام پرستی اب بھی
رنگ ِ حیرت کےتلاطم کو جلو میں لے کر
سب حسیں چہروں کو پائندہ بنا دیتا ہے
دیکھنے میں تو ہوں اک پیر ِ طریقت، لیکن
اب بھی ہوں ایک جوان فکر، فسوں کار ادیب
تیشہ ٗ فکر کا آزر ہوں، عجب نظم تراش
میرے قاری تو مجھے اب بھی نیا کہتے ہیں

۔۔۔۔۔۔۔۔۔۔۔۔۔۔۔۔۔۔۔۔۔۔

کل ستاروں کی طرف دیکھ کے میں کہتا تھا
آسماں نور کے پھولوں سے بھرا گلشن ہے
کسی طائر کا نشیمن جو نظر آتا تھا
میں سمجھتا تھا کہ گیتوں کا کوئی مسکن ہے
آج اس باغ کا پژمردہ و بے کیف شباب
ییاسی آنکھوں کے لیے گھونٹ ہے انگاروں کا
میری ہی طرح سے اڑتے ہوئے بیکار، فضول
کتنے ہمدرد ، وفا کیش ہیں سوکھے پتے
مجھ کو چلنے کی صدا دیتے ہیں ’’آ‘‘ کہتے ہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔

SHOPPING

راہ ِ ہستی پہ رہا گرم ِ سفر بچپن سے
برق رو، تیز قدم، دھوپ سے سنولایا ہوا
دیدہء  شوق سے راہوں کا تجسس تھا عیاں
چلتے رہنا ہی مرے عزم کی معراج تھی تب
ایک ہی تکمیلہء  شوق و تمنا تھا مرا
ایک ہی خبط تھا ہر میل پر پتھر گاڑوں
نظم کی راہ کٹھن ہے، اسے ہموار کروں
آج میں خوش ہوں، مرے نقش قدم روشن ہیں
دیکھنے والے انہیں قبلہ نما کہتے ہیں۔

SHOPPING

ستیہ پال آنند
ستیہ پال آنند
شاعر، مصنف اور دھرتی کا سچا بیٹا

بذریعہ فیس بک تبصرہ تحریر کریں

براہ راست تبصرہ تحریر کریں۔

Your email address will not be published. Required fields are marked *