یہ کہہ سکتے ہو ہم دل میں نہیں ہیں پر یہ بتلاؤ
کہ جب دل میں تمھیں تم ہو تو آنکھوں سے نہاں کیوں ہو
۔۔۔۔۔۔۔۔۔۔

ستیہ پال آنند
یقیناً صنعت ِ ترسیع وہ تسبیع ہے جس سے
سبھی ارکان یعنی آٹھ کے آٹھوں (مفاعیلن)
بہم منکوں سے اک اک کر کے جیسے جُڑتے جاتے ہیں
یہ کہہ سکتے(مفاعیلن) ہو ہم دل میں (مفاعیلن)
نہیں ہیں پر(مفاعیلن)یہ بتلاوٗ (مفاعیلن)
یہ استادی ہے استاذی ، اسے ہم بھی سمجھتے ہیں

مرزا غالب
سمجھنے میں، عزیزی، تم بہت ہشیار ہو، لیکن
اسے الفاظ میں ملبوس کر نا کارے دار د ہے

ستیہ پال آنند
نہیں، قبلہ، ذرا دیکھیں یہ استفسار کیسا ہے

مرزا غالب
کہو، جو کچھ بھی کہنا ہے، کہو، اے ستیہ پال آنند

ستیہ پال آنند
ذرا ـ’’دلـ ‘‘ اور ’’آنکھوں‘‘ پر تو، قبلہ، غور فرمائیں
ہے ان میں یہ نزاع و چپقلش کیسی، جناب ِ من
مجھے اتنا تو سمجھائیں کہ اس جھگڑے میں کیا کچھ ہے ؟
کہاں دل؟ گوشت کی اک ’’ڈگڈگی ‘‘ بجتی ہوئی، یعنی
کہیں سینے میں حیث و بحث میں ڈوبا ہوا ڈمرو
کہاں عین الیقیں، بینائی کی محرم یہ دو آنکھیں ؟
بہر جا، مطلق و مثبت ۔۔۔ سبھی کچھ دیکھنے والی

مرزا غالب
عزیزی، چشم ِ بینا اور دل میں فاصلہ کیا ہے
بس اک لمحے کا، لیکن دل تو خود میں بے بصر ٹھہرا

ستیہ پال آنند
ہمارےبے بصر د ل اور ان بیدار آنکھوں میں
بھلا کیا ہے توافق ؟ آپ فرمائیں گے کیا ، استاد؟
جہاں دل راست گفتاری سے ڈرتا ہے، وہاں آنکھیں
صداقت کی ہمہ بیں ناظر و موجود شاہد ہیں

مرزا غالب
وہ جو وہم و گماں ہے دل کی دنیا میں دھندلکے سا
مجازاً بھی نہیں آئے گا آنکھوں کے اجالے میں!
مگر معنی تو سیدھے، صاف ہیں اس شعر کے آنندؔ
اگر دل میں بسیرا ہے مرے معشوق کا ، تو پھر
مجھے دیدار ملنے میں ہے کیوں آزر دگی، صاحب؟

ستیہ پال آنند
تو گویا آپ بھی تسلیم کرتے ہیں، جناب ِ من
ـ’’پئے نظر ِ کرم تحفہ ہے شرم ِ نا رسائی کا‘‘
تو پھر اس ’’نا رسا ‘‘ کو دل میں ہی محبوس رہنے دیں