ہیں زوال آمادہ اجزا آفرینش کے تمام
مہر گردوں ہے چراغ ِ رہگذر ِ باد یاں
۰۰۰۰۰۰۰۰
ستیہ پال آنند
پیشتر اس کےکہ مَیں تشریح میں کچھ بھی کہوں
استعارہ اور پیکر کے لیے بھرپور داد
مہر گردوں اور چراغ ِ رہگزر ،کیا جوڑ ہے
انتداب و وصل بھی اور افتراق و قطع بھی
روشنی ، یعنی دئیے کی ۔۔۔بالمقابل نور ِ مہر
“مہر گردوں ہے چراغ ِ رہگذر باد”۔۔واہ
واہ واہ اور واہ واہ اور واہ واہ اور واہ واہ

مرز ا غالب
“داد جب حد سے گذر جائے توبتلانا مجھے”
یہ کہا تھا میں نے ہی تفتہؔ کو کچھ دن پیشتر
داد بھی بیداد ہو جاتی ہے گر حد سے بڑھے!

ستیہ پال آنند
جی، طبیعت کا ہمیشہ سے ہی جذبا تی ہوں میں
اس لیے کچھ آج حد سے بڑھ گیا ہے یہ چلن
اب اجازت دیں تو میں کچھ پوچھ ہی لوں آپ سے؟
ابتدائی بات تو ہے سیدھی سادی سی ، حضور
“آفرینش” کیا فقط ہیں یہ زمین و آسماں ؟
کیا فقط، سورج، ستارے ؟ دُرـ ِ چرخ ِ کہنہ رُو
آفرینش میں ہی شامل کیا ہیں ہم انسان بھی؟

مرزا غالب
ہاں، عزیزی، میں نے جب یہ کہہ دیا “اجزا تمام”
پھر تو شک کی کوئی گنجائش نہیں ہے اس جگہ

ستیہ پال آنند
پھر تو گویا، بندہ پرور، یہ سبھی شامل ہوئے
(عالم ِلاہوت میں؟ یا عالم ِ ناسوت میں)
سارے اجزا۔۔۔دیمقراسی سالمات و نیم وا
مادۃ العبدان۔۔۔یا ذی روح اِنس و بشریت؟
عبد ِ آب و گِل؟ جگت باسی منُش، بندہ ، بشر؟
یا نباتاتی ، خیابانی اپج، روئیدگی؟

مرزا غالب
ہاں، عزیزی، یہ تو بالکل سیدھی سادی بات ہے
وجہ اس کی کیا ہے، اس کے واسطے کچھ تم کہو

ستیہ پال آنند
اس زوال آمادگی کی وجہ کیا ہے، سوچئے
کیوں زوال آمادہ ہیں یہ آفرینش کے نشاں؟
آفرینش کے تمام اجزا تو شاید ہوں ، نہ ہوں
ہے زوال آمادہ اِنس و بشریت صدیوں سے اب
نسلیات و بشریت شاید ترقی زن ہوں ، پر
اِنسی آدم دوستی مفتود ہے خلقت میں اب